«Толибон» ҳаракатининг раҳбари билан учрашув бўлиб ўтди: Кейинги учрашув Самарқандда бўлиши мумкин
8 август куни Ўзбекистон ташқи ишлар вазирлигида «Толибон» ҳаракатининг Доҳадаги сиёсий офиси раҳбари мулла Бародар Ахунд бошчилигидаги ҳаракат вакиллари билан учрашув бўлиб ўтди, дея хабар қилди ТИВ матбуот хизмати.
Учрашув чоғида Афғонистонда барқарор ва узоқ муддатли тинчликка эришиш мақсадида мамлакатда тинч сиёсий жараёнларни илгари суриш билан боғлиқ масалалар муҳокама қилинди.
Мулла Бародар Ўзбекистон раҳбариятига Афғонистонга доимий эътибор қаратаётгани учун самимий миннатдорчилик билдирди ва Ўзбекистон саъй-ҳаракатлари туфайли Афғонистон муаммоси яна жаҳон ҳамжамияти диққат марказига тушганини алоҳида қайд этди.
«Толибон» ҳаракатининг сиёсий офиси раҳбари афғонлараро мулоқотнинг навбатдаги раундини Самарқанд шаҳрида ўтказиш тўғрисидаги таклифни қўллаб-қувватлади.
Мазкур тадбирнинг Афғонистондаги ҳозирги реал вазият нуқтаи назаридан ўз вақтида ташкиллаштирилаётгани ва долзарблиги қайд этилди ва Ўзбекистон томонининг мазкур учрашувни ўтказиш учун зарур шароитлар яратиб беришга тайёрлиги учун миннатдорлик изҳор этди. Музокаралар чоғида афғон халқининг ўз тақдирини ўзи ҳал қилиши ва ўз келажагини қуриш ҳуқуқи яна бир бор таъкидланди.
