«Трамп урушни тугатиши мумкин». Туркияда сайлов ўтказилиши талаб қилинмоқда. Хитой Ўзбекистонда чиқиндидан энергия ишлаб чиқармоқчи
🔹 Туркиянинг асосий мухолифат партияси етакчиси Ўзғур Ўзелнинг айтишича, бир ҳафтадан буён давом этаётган зиддиятли норозилик намойишлари навбатдан ташқари сайлов эълон қилинмагунича ёки Истанбул мэри Экрем Имомўғли озод этилмагунча давом этади. Мэр ҳибсга олинганидан бери бутун мамлакат бўйлаб энг йирик оммавий норозилик намойишлари бўлиб ўтди. Полиция 1400 дан ортиқ одамни, жумладан намойишларни ёритган журналистларни ҳибсга олган. Президент Ражаб Тоййиб Эрдўған воқеаларни “кўча террори” деб атади.
🔹 Украина президенти Владимир Зеленский Доналд Трамп ҳақиқатан ҳам урушни 24 соат ичида тугатиш ҳақидаги ваъдасини бажаришга қодир эканлигини айтди, фақат бир шарт билан: агар АҚШ Украинани НАТОга қабул қилишга қарор қилса.
🔹 АҚШ маъмурияти мамлакатдан ташқарида ишлаб чиқарилган барча автомобилларга 25 фоизлик импорт божлари жорий қилмоқчи. Германиянинг Porsche ва Mercedes-Benz Group автомобиль ишлаб чиқарувчилари бундан энг кўп зарар кўради.
🔹 Франция Украина учун қўшимча 2 миллиард евро ҳарбий ёрдам ажратади. Бу ҳақда Франция президенти Эммануэль Макрон Парижга ташриф буюрган Владимир Зеленский билан матбуот анжуманида маълум қилди.
🔹 Қозоғистоннинг Туркистон шаҳри ҳунармандчилик маркази мақомини тасдиқловчи халқаро сертификат олди.
🔹 2024 йилда Россия фуқаролигини олган хорижликлар сони сўнгги беш йил ичида рекорд даражада паст (209 минг хорижлик) бўлди. Бунга депортациялар ошиши, Тожикистон фуқаролари томонидан амалга оширилган «Крокус»даги терактдан кейинги мигрантларга қарши позиция, шунингдек, янги Россия фуқароларини урушга мажбуран юбориш сабаб, дейилмоқда.
🔹 Хитойнинг учта компанияси Ўзбекистоннинг олти вилоятида яқин икки йил ичида қаттиқ маиший чиқиндини ёқувчи электр станцияси қуради. Ҳам чиқинди утилизация қилинади, ҳам ҳудудлар электр энергияси билан таъминланади.
🔹 Боливияда сув тошқинлари содир бўлди. Оқибатда камида 51 киши ҳалок бўлган. Ёмғирлар мавсумида дарёлар қирғоқларидан тошган, мамлакатда фавқулодда ҳолат эълон қилинди.
Гулнора Холдорова тайёрлади.
