Якка тартибдаги уй-жой қуришни нимадан бошлаш керак?
Вазирлар Маҳкамасининг 2022 йил 20 апрелдаги 200-сон қарорига мувофиқ, лойиҳа-смета ҳужжатларини келишмасдан якка тартибдаги уй-жой қуриш ва реконструкция қилиш тақиқланади.
Лойиҳа-смета ҳужжатлари тегишли лицензияси бўлган лойиҳа ташкилоти томонидан ишлаб чиқилади ва унда бино ва иншоот ҳамда якка тартибдаги уй-жойнинг умумий майдони кўрсатилиши керак.
Икки қаватдан юқори бўлмаган, баландлиги ер юзасидан 12 метрдан ва умумий майдони 500 квадрат метрдан ортиқ бўлмаган якка тартибдаги уй-жойларни қуриш ҳамда реконструкция қилиш лойиҳа-смета ҳужжатларини экспертизадан ўтказиш ва қурилиш соҳасида ҳудудий назорат инспекцияларидан рўйхатдан ўтказиш талаб этилмайди. Якка тартибдаги уй-жойларни қуриш учун мўлжалланган ер участкасида бир оила аъзолари учун мазкур уй-жойнинг ҳовлисига мустақил чиқишга эга икки ва ундан ортиқ якка тартибдаги тураржой биноси қуришга рухсат берилади.
Ариза берувчилар лойиҳа-смета ҳужжатларини келишиш учун Давлат хизматлари марказларига ўзи келиб мурожаат этади ёки Ўзбекистон Республикаси Ягона интерактив давлат хизматлари порталида давлат хизматидан электрон шаклда фойдаланиш учун рўйхатдан ўтади. Сўровномага лойиҳа-смета ҳужжатларининг электрон кўринишдаги эскиз лойиҳаси PDF ёки JPEG форматда илова қилинади.
Шундан кейин туман ёки шаҳар қурилиш бўлимлари QR-код қўйилган лойиҳа-смета ҳужжатлари келишилганлиги ҳақидаги хулосани беради ёки рад этишнинг аниқ асосларини ва қонунчилик ҳужжатлари нормаларини кўрсатган ҳолда келишишни рад этади. Ариза берувчилар лойиҳа-смета ҳужжатларини келишиш рад этилгандан кейин ўн кун мобайнида давлат хизмати кўрсатиш учун йиғимни тўламасдан қайта мурожаат қилиш ҳуқуқига эга.
Ариза берувчилар томонидан лойиҳа-смета ҳужжатларини келишишни рад этиш учун асос бўлган сабаблар бартараф этилганда такроран келишиш туман (шаҳар) қурилиш бўлимлари томонидан икки иш кунида амалга оширилади.
Рустам НОРҚУЛОВ,
Самарқанд тумани Давлат хизматлари маркази бош мутахассиси.
