Янги йил арчалари Самарқанд шаҳрининг қайси ҳудудларида ўрнатиляпти?
Саноқли кунлардан сўнг 2023 йил кириб келади. Янги йилни кўтаринки кайфиятда қарши олиш, “Президент арчаси” тадбирларини ташкил этиш учун вилоятда тайёргарлик ишлари бошланиб кетди.
Самарқанд шаҳрининг Кўксарой майдони, Темирйўл вокзали ҳудуди, Алишер Навоий кўчаси, Сартепа ва Қорасув массивларида, шунингдек, Фарҳод, Сўлим ва Кимёгарлар шаҳарчасида улкан арчалар ўрнатилмоқда.
Аҳолига хушкайфият улашиш мақсадида байрам арафасида йўловчи ташиш транспортларни Янги йил байрами қаҳрамонлари кийимидаги 200 нафар ҳайдовчи бошқариши режалаштирилган.
Шаҳарнинг марказий кўчаларида жойлашган корхона ва ташкилотлар, савдо ва маиший хизмат кўрсатиш шохобчаларини байрам руҳида безаш кўзда тутилган.
Шунингдек, барча бозорларда торт ва ширинликлар ярмаркалари ташкил этилади.
