“5 muhim tashabbus” festivali g‘oliblari taqdirlandi
Samarqand shahridagi davlatimiz rahbari tomonidan ilgari surilgan “5 muhim tashabbus” doirasida o‘tkazilgan respublika ko‘rik-tanlov, festival va sport musobaqalarining viloyatdagi g‘oliblarini taqdirlashga bag‘ishlangan tadbir bo‘lib o‘tdi.
Unda ishtirok etgan viloyat xalq ta’limi boshqarmasi boshlig‘i Shokir Sultonov “5 muhim tashabbus” bugun o‘quvchi-yoshlarni har tomonlama qo‘llab-quvvatlashda, ularning o‘z iqtidorlari va imkoniyatlarini yuzaga chiqarishda muhim ahamiyat kasb etayotganini ta’kidladi.
Tadbirda g‘olib o‘quvchilar, ularning ustozlari va maktab direktorlariga Xalq ta’limi vazirligi tomonidan ajratilgan zarur jihozlar topshirildi. O‘quvchilarning ijodiy ishlari namoyishi, yosh havaskorlar ijrosidagi kuy-qo‘shiqlar tadbirga bayramona ruh bag‘ishladi.
- Maktabimiz mazkur festivalning ikkita yo‘nalishida g‘olib bo‘ldi, - deydi Kattaqo‘rg‘on shahridagi 11-ixtisoslashgan davlat umumta’lim maktabi direktori Ozoda Salimova. - Jumladan, "Teatr san’ati" yo‘nalishi bo‘yicha respublikada 1-o‘rinni, "Uyga vazifa" yo‘nalishi bo‘yicha 3-o‘rinni qo‘lga kiritdik va Xalk ta’limi vazirligining sertifikat hamda faxriy yorliqlari bilan taqdirlandik. Yana bir muhim tomoni, maktabimizning faollar zaliga mikrofon, ovoz kuchaytirgich kabi jihozlar, noutbuk, tikuv mashinalari, smart-soatlar va koptoklar sovg‘a qilindi.
