“Al-Furqon”dan tuhfa
Imom Buxoriy xalqaro ilmiy-tadqiqot markazida Buyuk Britaniyaning “Al-Furqon” islom merosi fondi tomonidan taqdim etilgan kitoblar taqdimoti o‘tkazildi.
Islomshunos olimlar, xalqaro markazi hamda Hadis ilmi maktabi xodimlari, tinglovchilar ishtirok etgan tadbirda davlatimiz rahbari tashabbusi bilan 2017 yilda tashkil etilgan Imom Buxoriy xalqaro ilmiy-tadqiqot markazi tomonidan o‘tgan qisqa davr mobaynida buyuk allomalarimiz merosini o‘rganish va keng targ‘ib etish, xorijiy davlatlardagi nufuzli xalqaro markazlar bilan hamkorlikni yo‘lga qo‘yish bo‘yicha keng ko‘lamli ishlar olib borilayotgani ta’kidlandi. Bu ishlar samarasi o‘laroq ayni paytda dunyoning 24 ta yetakchi islom tadqiqot markazlari, universitetlar bilan hamkorlik aloqalari o‘rnatilgan.
– Buyuk Britaniyaning “Al-Furqon” fondi bilan yo‘lga qo‘yilgan yaqin hamkorlik natijasida yaqinda mazkur fond tomonidan markazimizga dunyoning turli mamlakatlaridagi kutubxonalarda saqlanayotgan nodir qo‘lyozma asarlarning kataloglari va boshqa manbalardan iborat yuzga yaqin kitoblar to‘plami hadya etildi, – deydi Imom Buxoriy xalqaro ilmiy-tadqiqot markazi direktori Sh.Ziyodov. – Bu kitoblar orasida arab, turk, fors tillaridagi noyob qo‘lyozmalar, kataloglar borki, ular yordamida zaminimizdan yetishib chiqqan buyuk allomalarning asarlari haqida ma’lumot olish, ularning qayerda saqlanayotganini bilish mumkin. Misol uchun, Burkina Faso, Kot-d´Ivuar singari Afrika davlatlari, shuningdek, Yevropaning bir qator mamlakatlarida nashr etilgan kataloglar yordamida ushbu yurtlardagi kutubxona va qo‘lyozma fondlarda saqlanayotgan asarlar to‘g‘risida qimmatli ma’lumotlarga ega bo‘lamiz. Bu esa ulug‘ ajdodlarimizning ma’naviy merosini o‘rganish va tadqiq etishga yordam beradi.
Taqdimot chog‘ida markaz xodimlari tomonidan yaqinda Turkiyadan keltirilgan Imom Moturidiyning turk tiliga tarjima qilingan 18 jildlik “Ta’vilotul Qur’on” asari haqida ham ma’lumot berildi. Bu asar Turkiyaning Marmara universiteti Ilohiyot fakulteti tomonidan markazga tuhfa qilingan.
Marosimda joriy yilda Imom Abu Mansur Moturidiy tavalludiga 1150 yil to‘lishi va shu munosabat bilan amalga oshirilayotgan ilmiy tadqiqot ishlari haqida ham ma’lumot berildi. Xususan, 3-5 mart kunlari Samarqandda tashkil etilayotgan “Imom Abu Mansur Moturidiy va moturidiya ta’limoti: o‘tmish va bugun” mavzuidagi xalqaro anjumanning sho‘’ba majlislari Imom Buxoriy xalqaro ilmiy-tadqiqot markazi hamda Hadis ilmi maktabida o‘tkazilishi, ushbu tadbirga tayyorgarlik haqida so‘z yuritildi.
G‘.HASANOV, A.ISROILOV.
