Anomal sovuqlik qanday xavflar keltirib chiqarishi mumkin?

Qish oylaridagi g‘ayritabiiy sovuq ob-havo uy-joy kommunal xo‘jaligi, elektr energiya tarmoqlarida yuklama ortishi, gaz quvurlarida bosimning keskin pasayishi va unga teskari aholi xonadonlari, ijtimoiy ob’yektlar va korxonalarda energetik yuklamaning ortishiga olib keladi.

Qishloq xo‘jaligi sektorida ham haroratning keskin pasayishi tuproq ustidagi haroratning havo haroratidan 5-10 daraja pasayishiga, tuproq sirtining kuchli sovishi, yerning chuqur muzlashiga olib keladi. Issiqxona faoliyatini og‘irlashtiradi. Tokzorchilik yo‘nalishida sifatli o‘ralmagan toklarda kuchli sovuq urishi kuzatiladi.

Anomal sovuqning faol bosqichida atmosfera bosimining keskin ko‘tarilishi ro‘y beradi. Prognozlarga ko‘ra, 12-14 yanvar kunlari shimolda 1055 gPa, poytaxt Toshkentda 1050 gPaga yetadi. Yuqori atmosfera bosimi odam sog‘lig‘iga jiddiy ta’sir qiladi. Ayniqsa, u allergik, astmatik hamda qon bosimi xastaliklari bilan og‘riyotgan bo‘lsa. Tashqi muhitda uzoq qolib ketish, qahraton sovuqda inson o‘limiga olib kelishi mumkin.

Havo transport yo‘nalishida ham muammolar mavjud. Sovuqlik omili va kuchli qor bo‘ronlar aviareyslar taqvimiga o‘zgartirishlar kiritadi. Avtomobil yo‘llarida muzlamalar avtotransport harakatini yomonlashtiradi. Temir yo‘l poyezd qatnovi grafiklarida ham (temir yo‘l relslari torayishi hisobiga) o‘zgarishlar bo‘lishi mumkin (https://t.me/uzb_meteo/10353).