Armiya ko‘rgazmasiga marhamat!
8 yanvar kuni Samarqand shahridagi Ko‘ksaroy maydonida “Mening armiyam – mening faxrim!” festivali o‘tkaziladi.
O‘zbekiston Respublikasi Qurolli Kuchlari tashkil etilganligining 27 yilligi hamda Vatan himoyachilari kuni munosabati bilan uyushtirilayotgan festival doirasida harbiylarning tantanali yurishi, harbiy texnika va maxsus mashinalar, qurol-aslahalar ko‘rgazmasi namoyish etiladi.
Darvoqe, Registon ko‘chasi bo‘ylab ommaviy yugurish marofoni o‘tkazilib, g‘oliblar va faol ishtirokchilar munosib rag‘batlantiriladi.
Viloyat musiqali drama teatri oldidagi sahnada harbiy orkestr konserti, teatrda esa harbiylar va ularning oila a’zolari uchun “Oqpadar” spektakli namoyishi rejalashtirilgan.
Xullas, festivalga kelsangiz, afsuslanmaysiz. Bir olam taassurot olishingiz, faol bo‘lsangiz sovg‘alar bilan qaytishingiz ham mumkin!
