Avstriyada COVID-19 pandemiyasining ikkinchi to‘lqini boshlandi

Avstriya kansleri Sebastyan Kurs mamlakatda koronavirus pandemiyasining ikkinchi to‘lqini boshlanganini e’lon qildi. Bu haqda Avstriya nashriyoti agentligi ma’lum qildi.

“Ikki hafta ilgari bir kecha-kunduzda 350 nafar yangi kasallanish holatlari qayd etilayotgan edi, kecha bu ko‘rsatkich 850 nafardan oshib ketdi. Ayniqsa, Venada vaziyat og‘ir. U yerda butun Avstriya bo‘ylab yangi kasallanganlarning 50 foizi qayd etilgan. Yaqin kunlarda bir kecha-kunduzdagi ming nafar kasallanish holati ko‘rsatkichiga yetamiz”, dedi Kurs kuz va qish fasllari og‘ir o‘tishini alohida ta’kidlab.

Shu munosabat bilan kansler Avstriya aholisini infeksiya tarqalishining oldini olish chora-tadbirlariga rioya etishga chaqirdi. “Endi barchamizni bahor oylarida ko‘rsatgan intizom va ogohlik bilan kelgusi oylarning qiyinchiliklarini yengishga chaqiraman”, deb nutqiga yakun yasadi kansler.