“Birinchi raqamlilar maydonda”: Hokim va sektor rahbarlari o‘rtasidagi futbol musobaqasiga jamoatchilik e’tibor qaratmoqda
Ehtimol, rahbarlar o‘rtasidagi bunday musobaqalar ilk marta o‘tkazilayotgani uchunmi shahar, tumanlar hokimlari va sektor rahbarlari ishtirokidagi mini futbol musobaqasi ijtimoiy tarmoqlarda ham iliq kutib olindi. Qolaversa, mazkur musobaqaning ayni paxta mavsumiga to‘g‘ri kelgani, ko‘p yillar davomida mas’ul tashkilotlar rahbarlari bu vaqtda dalada bo‘lgani ham nazardan chetda qolmadi.
Xo‘sh, tarmoqlarda ba’zan samimiy, goh yumor bilan kutib olingan bu musobaqa qanday tashkil etildi?
Musobaqa viloyat hokimi tomonidan shu yil avgust oyida tasdiqlangan nizomga asosan uyushtirilgan bo‘lib, viloyatda davlat idoralari rahbar xodimlari o‘rtasida sog‘lom turmush tarzini va sportni keng targ‘ib qilish, ularning hamkorligini yanada mustahkamlash, ish jarayonida bir-birlarini yaqindan tushunishlarini ta’minlash, sport o‘yinlari orqali barchani sog‘lom turmush tarziga targ‘ib qilish kabi maqsadlar ko‘zlangan.
Viloyat hamda shahar, tumanlar 5 ta sektor rahbarlari va ularning o‘rinbosarlaridan iborat jamoalar o‘rtasida mini-futbol bo‘yicha "Viloyat hokimi kubogi” bellashuvlari shu yilning 21 sentyabr kuni boshlandi.
Ushbu musobaqani yuqori saviyada tashkil etish va o‘tkazish uchun ishlab chiqilgan chora-tadbirlar rejasiga muvofiq 4 ta hududda (Samarqand va Kattaqo‘rg‘on shaharlari hamda Ishtixon va Tayloq tumanlaridagi stadionlarda) o‘tkaziladigan guruh bosqichida 17 jamoa ishtirok etdi.
Qur’a natijalariga ko‘ra,
“A” guruhidan Samarqand viloyati, Samarqand shahri, Oqdaryo, Samarqand va Bulung‘ur tumanlari;
“V” guruhidan Kattaqo‘rg‘on shahri, Paxtachi, Kattaqo‘rg‘on va Pastdarg‘om tumanlari;
“S” guruhidan Tayloq, Jomboy, Qo‘shrabot va Narpay tumanlari;
“D” guruhidan Ishtixon, Nurobod, Payariq va Urgut tumanlari jamoalari o‘rin olgan.
Musobaqa jadvaliga asosan o‘yinlar qizg‘in davom etmoqda. Yarim final va final o‘yinlaridan lavhalar tayyorlash ko‘zda tutilgan.
Final uchrashuvlari 6 oktyabr kuni Past Darg‘om tumanidagi futbol maktabi o‘yingohida o‘tkaziladi va g‘oliblar esdalik sovg‘alari bilan taqdirlanadi.
