Bokschilarga Prezident sovg‘alari topshirildi

30.09.2019 22:00
268
Sport

Yekaterinburgda bo‘lib o‘tgan jahon chempionatida birinchilikni qo‘lga kiritib qaytgan bokschilarga Prezident sovg‘alari topshirildi, deb xabar qilmoqda boks federatsiyasi.

Ushbu jahon birinchiligida o‘zbekistonlik charm qo‘lqop ustalari har qachongidan ham muvaffaqiyatli ishtirok etib, 3 ta oltin, 1 ta kumush va 1 ta bronza medallarini qo‘lga kiritishdi. Bu orqali yigitlarimiz jahon chempionatini umumjamoa hisobida birinchi o‘rinda yakunlashdi.

Bugun, 30 sentyabr kuni poytaxtimizdagi "Olimpiya shon-shuhrati" muzeyida bokschilarimizni taqdirlash marosimi bo‘lib o‘tdi. Unda O‘zbekiston Respublikasi Bosh vazirining birinchi o‘rinbosari, O‘zbekiston boks federatsiyasi raisi Ochilboy Ramatov, O‘zbekiston Milliy olimpiya qo‘mitasi prezidenti Rustam Shoabdurahmonov, Jismoniy tarbiya va sport vaziri Dilmurod Nabiyev, sportchi va murabbiylar, ommaviy axborot vositalari xodimlari va boshqalar ishtirok etishdi.

Tadbir davomida Ochilboy Ramatov so‘zga chiqar ekan, sportchilarimizni qo‘lga kiritilgan muvaffaqiyat bilan muborakbod etdi. Ushbu muvaffaqiyat zamirida mamlakatimiz Prezidenti Shavkat Mirziyoyev tomonidan qaratilayotgan e’tibor turganini alohida qayd etib o‘tdi. Shuningdek, erishilgan yutuq bilan to‘xtab qolmaslik, maqsad qilingan ishni hozircha bir qismigina bajarilganini, Tokio Olimpiadasida bundanda ulkan zafarlar kutilishini ta’kidladi.

Bundan tashqari, tadbir davomida terma jamoamiz murabbiylari Marat Qurbonov, Rahmatjon Ro‘zioxunov, bokschi Bahodir Jalolov va Dilshodbek Ro‘zmetovlar ham so‘zga chiqib, ushbu e’tibordan mamnun ekanliklarini aytishdi. Kelajakda bundan-da yirik muvaffaqiyatlarga erishishlarini qayd etishdi.

Shundan so‘ng jahon chempionati qahramonlariga "Prezident sovg‘asi" - avtomobillar taqdim etildi. Jahon chempionatida oltin medalni qo‘lga kiritgan Shahobiddin Zoirov, Mirazizbek Mirzahalilov va Bahodir Jalolovlarga "Tracker" avtomobili, kumush va bronza medali sohiblari Dilshodbek Ro‘zmetovga "Gentra", Bobousmon Baturovlarga "Nexia 3" avtomobillari kaliti topshirildi.