Bugun tug‘ilgan kun: Muayyana Xo‘jayeva
O‘zbekistonda xizmat ko‘rsatgan jurnalist Muayyana Xo‘jayeva 1941 yil 6 iyulda Samarqand shahrida tug‘ilgan.
Samarqand tumani Bog‘ibaland qishlog‘idagi 10-maktabda ilk ta’limni olgach, keyinchalik 6-o‘rta ta’lim maktabida o‘qigan. So‘ngra Samarqand davlat universitetining filologiya fakultetini bitirib, Toshkent shahridagi “O‘zbekistoni Surx” (keyinchalik “Haqiqati O‘zbekiston”) va hozirda “Ovozi tojik” respublika gazetasida tarjimon, adabiy xodim bo‘lib ishlagan.
Shuningdek, respublika radiosida tojik tilida diktor vazifasida faoliyat ko‘rsatgan.
1991 yil nafaqaga qadar “Ovozi tojik” gazetasining Samarqanddagi maxsus muxbiri bo‘lib faoliyat ko‘rsatgan. Bir vaqtda STV telekanalining tojik tahririyatida muharrir bo‘lgan.
1992 yilda "O‘zbekistonda xizmat ko‘rsatgan jurnalist" unvoniga sazovor bo‘lgan Muayyana Xo‘jayeva “Rizvon erur Vatan”, “Toji sharaf”, “Armug‘oni yavasliy”, “Matonat” kitoblarini chop ettirgan.
