Bugun tug‘ilgan kun: O‘zbekiston xalq artisti Ta’naberdi Qurbonov
T.Qurbonov 1935 yil 8 avgustda Past Darg‘om tumanidagi Arabxona qishlog‘ida tug‘ildi.
Samarqand davlat universiteti hamda Toshkent teatr va rassomchilik institutida tahsil oldi. Samarqand viloyat davlat musiqa va drama teatrida aktyor, so‘ngra 25 yil direktor hamda badiiy rahbar bo‘lib ishladi. “Otello” tragediyasida Otello, “Qiyomat qarz” asarida Sulaymon ota, “Mirzo Ulug‘bek” dramasida Ulug‘bek rollari bilan mamlakatga tanildi. Rejissyor sifatida 20 ga yaqin asarlar sahnalashtirdi, teatr san’atiga oid 100 ga yaqin maqola, bitta kitob yozdi.
1974 yilda O‘zbekistonda xizmat ko‘rsatgan artist, 1978 yilda O‘zbekiston xalq artisti, 2000 yilda “El-yurt hurmati” ordeni sohibi bo‘ldi.
Ta’naberdi Qurbonov 2015 yilda 80 yoshida vafot etdi.
Darvoqe, O‘zbekiston milliy teleradiokompaniyasining madaniyat va ma’rifat telekanali 2020 yilda Ta’naberdi Qurbonovning 85 yilligi munosabati bilan "Dadajonim" filmini yaratdi.
