Cho‘yantepa uzumlari xorijga ham eksport qilinadi
Bulung‘ur tumanining Cho‘yantepa mahallasida 594 xonadon bo‘lib, ularning 500 tasida uzum parvarishlanadi.
“Bir mahalla – bir mahsulot” tamoyili aynan cho‘yantepaliklarga xos. Ularning tajribasini boshqa mahallalarga o‘rnak qilib ko‘rsatish maqsadida bu qishloqda tez-tez ko‘rgazmali seminarlar o‘tkazib turiladi.
- Tomorqam 30 sotix, - deydi shu mahallada yashovchi Sulton Pardayev. – 22 sotixida uzumning qora kishmish, oq kishmish, husayni toifi kabi navlarini parvarishlayman. Asosan, so‘ri usulida yetishtirilgan uzum yaxshi hosil beradi. Har bir tupdan o‘rtacha 50 kilogrammgacha uzum olyapmiz.
Mahalladagi usta dehqonlar yaqinda Oltiariq tumanidagi ko‘rgazmali seminarda ishtirok etib kelgach, hovlisidan tashqari yo‘l chetlarida ham voyish usulida uzum yetishtira boshladi. Kelgusida mahalladagi har bir xonadon va ko‘chalarda voyishlar tashkil etish rejalashtirilgan.
E’zoza Meyliyeva,
Dinora Hamidova,
Baxtiyor Mustanov.
