Dam olish kunlari qanday ob-havo kuzatiladi?
Dam olish kunlari respublika hududiga xorijiy janubdan issiq va quruq oqim kirishi kuchayadi. Mamlakatning katta qismida ob-havo kam bulutli bo‘ladi. Harorat ko‘tarilib, yakshanba kuni kunduzi 37-39 darajagacha yetadi, bu me’yordan 4-6 darajaga yuqoridir.
«O‘zgidromet» xabariga ko‘ra, 23 avgustda respublikaning shimoliy tumanlarida Kavkaz hududidan kiradigan kam nam havo hisobiga ob-havo o‘zgaradi. Qoraqalpog‘istonda va Xorazm viloyatida bulutlilik ortadi, yog‘ingarchilik bo‘lmaydi, faqat Orolbo‘yi tumanlarida qisqa muddatli yomg‘ir yog‘ishi mumkin.
Dushanba kuni O‘zbekiston hududining katta qismida bulutlilik ortadi, biroq yuqori harorat foni saqlanib turadi, faqat respublikaning shimoliy tumanlarida harorat 28-33 darajagacha pasayadi.
23 avgustda shimoliy viloyatlarda, 24 avgustda barcha viloyatlar bo‘yicha ayrim joylarda shamolning tezligi sekundiga 15-20 metrgacha kuchayishi mumkin.
