Darslar to‘liq ingliz tilida:  Samarqand xalqaro texnologiya universitetida talabalar uchun tanishtiruv tadbirlari boshlandi

Samarqand xalqaro texnologiya universitetida yangi o‘quv yilining boshlanishi munosabati bilan o‘qishga qabul qilingan talabalar va ularning ota-onalari uchun 4 sentyabrdan 8 sentyabrga qadar “Tanishtiruv haftaligi” tadbirlari bo‘lib o‘tadi.

Shu munosabat bilan SIUT rektori, professor Yusuf Abdullayev tadbirda so‘z olib, talabalikka tavsiya etilgan yoshlarni qutladi.

Oliygohda tashkil etilgan tadbirlar orqali talabalar universitet faoliyati, dars jarayonlari, professor-o‘qituvchilar tarkibi, talabalar klublari bilan yaqindan tanishishdi. Mazkur tanishtiruv haftaligida xalqaro tajribaga ega trener Gulnara Emirali tomonidan barcha ta’lim yo‘nalishlariga “learn to learn” trening kursi o‘tkazildi.

Ma’lumot uchun: SIUTga AQSh, Italiya, Hindiston, Xitoy, Janubiy Koreya, Tunis, Eron, Qozog‘iston va Janubiy Afrikaning ta’lim va ilmiy-texnika markazlarida faoliyat olib borayotgan yetakchi professor-o‘qituvchilar va mutaxassislar ta’lim jarayonlari uchun taklif etilgan. Universitetda o‘quv rejalar va dasturlari jahon ta’lim standartlari asosida xorijiy texnika universitetlari bilan hamkorlikda yaratilgan va darslar to‘liq ingliz tilida olib boriladi.