Yevro-2020: Chempionlikka da’vogarlar saralanmoqda

Kecha futbol bo‘yicha Yevropa chempionatining 1/4 final o‘yinlariga start berildi. 

Dastlab Sankt-Peterburg shahridagi "Gazprom Arena" stadionida Shveysariya va Ispaniya terma jamoalari kuch sinashdi. Uchrashuvning asosiy va qo‘shimcha vaqtlarida durang natija (1:1) qayd etildi.

Penaltilar seriyasida Shveysariya ispanlarga “yo‘l berishga” majbur bo‘ldi: Ispaniya yarim finalga yo‘l oldi.  

Germaniyaning Myunxen shahridagi "Alyans-Arena" o‘yingohida esa Belgiya – Italiya terma jamoalari to‘qnashuvi bo‘lib o‘tdi. Juda katta ruhiy bosim ostida o‘tgan uchrashuv 2:1 hisobida Italiya foydasiga hal bo‘ldi.  

Shunday qilib, Ispaniyadan keyin Italiya ham keyingi 1/2 final bosqichiga chiqdi.

Bugun tunda ularning raqiblari kim bo‘lishini bilib olamiz. Ya’ni, Ozarbayjon poytaxti Baku shahridagi "Olimpiyskiy" stadionida Chexiya – Daniya terma jamoalari to‘p sursa, Rim shahridagi "Olimpiko" yashil maydonida Angliya – Ukraina terma jamoalari o‘yini bo‘lib o‘tadi.