“Harbiy-tibbiy estafeta”. Rekordlar yangilanib, natija takrorlandi – O‘ZBEKISTON G‘OLIB!
Joriy yil 23 avgustdan 5 sentyabrga qadar “ArMI-2020” VI Xalqaro armiya o‘yinlari doirasida O‘zbekiston Respublikasi Mudofaa vazirligiga qarashli “Forish” tog‘ poligonida o‘tkazilgan “Harbiy-tibbiy estafeta” tanlovi o‘z nihoyasiga yetdi. Bellashuvlarning barcha bosqichlarini o‘z foydasiga hal qilgan o‘zbekistonlik harbiy tibbiyotchilar bu gal ham ishonchli g‘alabaga erishib, 2019 yildagi natijalarini yangiladi.
Xalqaro bellashuvning «Individual mahorat» bosqichidagi harbiy shifokorlar bahslarida o‘zbekistonlik tibbiy xizmat katta leytenanti Sanjarbek A’zamov 2019 yilda hamyurti tomonidan o‘rnatilgan rekordni yangilab, 1645 ball to‘pladi.
O‘rta va kichik tibbiyot xodimlari o‘rtasida to‘siqlar yo‘lakchasidan o‘tishda hamyurtimiz kichik serjant Valijon Begaliyev 339 ball bilan rekord o‘rnatdi.
Ayollar orasida yana bir vakilimiz kichik serjant Liliya Manasipova 2019 yilgi shaxsiy (281 ball) rekordini yangilay oldi – 295 ball.
«Jamoaviy birinchilik» doirasidagi bellashuvlarda o‘zbekistonlik harbiy xizmatchilar 2019 yilda «Forish» tog‘ poligoni ilk bor mezbonlik qilgan «Harbiy-tibbiy estafeta»ning mazkur bosqichida o‘rnatilgan 07’35,9’’ (erkaklar) va 11’35,6’’ (ayollar) vaqtlik rekordlarni mos ravishda yangiladilar: 6’28,8’’ va 10’09,2’’.
Barcha shartlar bo‘yicha to‘plangan umumiy natijaga ko‘ra, 12857 ball bilan o‘tgan yilgi g‘olib – O‘zbekiston Mudofaa vazirligi harbiy tibbiyotchilari chempionlik titulini himoya qilib, g‘olib bo‘lishdi.
Rossiyaliklarda 10110 ball va ikkinchi o‘rin. Belorus jamoasi esa 6585 ball bilan sovrinli o‘rinni egalladi.
Keyingi o‘rinlar quyidagicha taqsimlandi – Tojikiston, Vetnam va Falastin.
G‘oliblar qimmatbaho sovg‘alar, jumladan, Gentra avtomobili bilan rag‘batlantirildi. Taqdirlash marosimida O‘zbekiston mudofaa vazirining o‘rinbosari polkovnik Hamdam Qarshiyev ishtirok etdi.
“Harbiy-tibbiy estafeta” xalqaro musobaqasining tantanali yopilish marosimi katta konsert dasturi va mushakbozlik bilan yakunlandi.
“ArMI-2020” “Harbiy tibbiy estafeta” tanlovi tashkiliy qo‘mitasining matbuot markazi
