Investitsiyalar nafaqat iqtisodiy taraqqiyotning, balki tinchlik va barqarorlikning kafolatidir
10-11 iyun kunlari IV Toshkent xalqaro investitsiya forumi hamda xorijiy investorlar kengashi majlisi bo‘lib o‘tdi.
Unda nafaqat O‘zbekiston, balki xalqaro hamjamiyat uchun ham dolzarb bo‘lgan masalalar muhokama qilindi. Forumning asosiy maqsadi — O‘zbekistonning investitsiyaviy jozibadorligini oshirish, xorijiy investorlar bilan hamkorlikni kuchaytirish va strategik islohotlarni xalqaro maydonda tanitishdan iborat bo‘ldi.
Mazkur forumda 7,5 mingdan ortiq delegat, jumladan, 100 ga yaqin davlatdan salkam 3 ming nafar xorijiy mehmon ishtirok etdi. Biz buni, avvalambor, mamlakatimizga bo‘lgan hurmat, o‘zaro ishonch va yaqin hamkorlikning chinakam ifodasi, deb bilamiz.
Prezidentimiz tomonidan keltirilgan raqamlar – IT eksportining 1 milliard dollarga yetishi, 2030yilga kelib, bu ko‘rsatkichni besh barobarga oshirish rejasi, 500 megavattli 20 ta “data markaz” qurilishi – bu mamlakatning raqamli transformatsiya yo‘lida jiddiy harakat qilayotganini ko‘rsatadi. Ayniqsa, “Bir million sun’iy intellekt yetakchilari” loyihasi yosh avlodni yangi texnologiyalar asosida tayyorlashga qaratilgan uzoq muddatli strategik yondashuvdir.
Shuningdek, Forumning asosiy mavzusi bo‘lgan investitsiyalar faqat iqtisodiy taraqqiyotning emas, balki tinchlik va barqarorlikning kafolatidir! Investitsiya muhitini yaratilishi aholimizga daromad keltirish bilan birga, inson qadrini ulug‘laydigan, uning hayotiy manfaatlarini ta’minlaydigan va jamiyat ravnaqiga xizmat qiladigan mustahkam poydevordir.
Bugungi kunda O‘zbekistonning yalpi ichki mahsuloti sakkiz yilda 2 barobar ko‘payib, 2030 yilga borib, bu ko‘rsatkichni 200 milliard dollarga yetkazilishi maqsad qilingan. O‘tgan yili investitsiya hajmi 35 milliard dollarga, eksport esa 27 milliard dollarga yetgani, bu – to‘rt yildan buyon o‘tkazib kelinayotgan Toshkent xalqaro investitsiya forumining ham amaliy natijasidir.
O‘tgan qisqa davrda bu sohaga qariyb 6 milliard dollar to‘g‘ridan-to‘g‘ri xorijiy investitsiya kirib keldi. Elektr energiyasi ishlab chiqarish hajmi 59 milliarddan 82 milliard kilovatt-soatga yetdi. Keyingi besh yilda bu ko‘rsatkich 120 milliard kilovatt-soatdan oshib, “yashil” energiya ulushi 54 foizga yetadi.
Elektr tarmoqlarini yangilashga ham 4 milliard dollar jalb etilishi va bu borada joriy yilda Samarqandda, kelgusi yildan yana 8 ta hududda elektr tarmoqlarini xususiy sheriklikka o‘tkazilishi sohadagi muammolarning maqbul yechimi desak mubolag‘a bo‘lmaydi. Bundan tashqari, ilk bor “yashil” sertifikat va uglerod birliklari savdosini boshladik. Shu yil global uglerod bozorlariga qo‘shilib, “Yashil O‘zbekiston” iqlim investitsiyalari platformasi yaratiladi.
Forum faqat tadbir emas, balki yangi bosqichga o‘tish ramzidir. Bu safargi forum biznes muhit jahon standartlariga moslashayotganini ko‘rsatadi va investorlarga ishonch mehrini oshiradi. Mazkur forumda iqtisodiy rivojlanish, investitsiyalar, yashil energiya, raqamli texnologiyalar yoki xavfsizlik kabi dolzarb mavzular muhokama qilindi. Bu mavzular global hamjamiyat uchun muhim, shu bilan birga O‘zbekiston uchun ham strategik ahamiyatga ega. Forumda turli mamlakatlardan kelgan delegatsiyalar ishtirok etdi, yangi shartnomalar, memorandumlar imzolandi. Bu O‘zbekiston iqtisodiyoti uchun yangi imkoniyatlar eshigini ochadi.
Forum O‘zbekistonning xalqaro hamkorlikka tayyor ekanini, investitsiyalar uchun ochiqligini va islohotlarni chuqurlashtirishdagi qat’iyatini ko‘rsatdi. Muxtasar qilib aytganda, Davlatimiz rahbarining ushbu nutqi O‘zbekistonning global investitsion muhitdagi o‘rni, innovatsiyalarni ilgari surishdagi qat’iyati va xalqaro hamkorlikdagi ochiqligini ko‘rsatdi.
Nasiba Mo‘minova,
O‘zLiDeP viloyat Kengashi bo‘lim mudiri, tuman Kengashi deputati.
