Moliyachilar teatrda o‘ziga xos tanlov tashkil qildi

Viloyat hokimligi moliya bosh boshqarmasi va tizimda faoliyat yurituvchi xodimlar dam olish kunlarini mazmunli o‘tkazish maqsadida Samarqand viloyati musiqali drama teatriga borishga odatlanishgan. Bu safar ular “Tanho yulduz” spektaklini tomosha qildi.

Teatr namoyishidan avval esa xodimlar o‘rtasida kitobxonlikni keng targ‘ib qilish maqsadida o‘ziga xos tanlov e’lon qilindi. Tanlov shartiga ko‘ra, xodim Samarqand viloyati musiqali drama teatrida tashkil etilgan kitob yarmarkasidan kitob xarid qilib, undagi voqealarni hikoya qilib berishi va asar mohiyatini ochib berishi lozim. Shuningdek, o‘qilgan kitob yuzasidan hakamlar hay’ati tomonidan beriladigan savollarga javob berishi kerak.

Tanlovda nafaqat xodimlar, balki ularning oila a’zolari ham ishtirok etishlari mumkin. Tanlov hali davom etadi va g‘oliblarga esdalik sovg‘alari taqdim etiladi.

Samarqand viloyati moliya bosh boshqarmasi axborot xizmati.