Munojot Yo‘lchiyeva: Samarqanddagi “Maqom”ning maqomini tinglab huzur qildim
Samarqand san’at kolleji konsert zalida Samarqand viloyat madaniyat boshqarmasi qoshida faoliyat yuritayotgan “Maqom” ansamblining ilk taqdimot konserti bo‘lib o‘tdi.
Unda ishtirok etgan O‘zbekiston xalq artisti Munojot Yo‘lchiyeva, O‘zbekiston xalq hofizi Mahmudjon Tojiboyev, respublika maqom markazi rahbari Soyibjon Begmatov, viloyat madaniyat boshqarmasi boshlig‘i Bahodir Sharofov va viloyatimiz san’at ahli Samarqand azaldan maqom yurti ekanligi, u bobolarimizdan meros qadim ohangligi, xalqimizning milliy qadriyatlarini yoshlarimizga o‘rgatishini e’tirof etdi.
- Bugungi qo‘shiqlarni hayajon bilan tinglab o‘tirdim, - deydi Munojot Yo‘lchiyeva. – Samarqanddagi “Maqom” ansamblining aynan yoshlardan tarkib topgani ham bizning yutug‘imiz. Ularning aksariyati shogirdlarimiz. Bugun ularning ijrosini tinglab, bergan saboqlarimiz beiz ketmaganiga amin bo‘ldim. Maqom san’atining rivojlanishiga Yurtboshimiz tomonidan e’tibor qaratilgani bejiz emas. Chunki maqom insonning yuragiga kirib boradi, ruhiyatini tarbiyalaydi. Maqom qo‘shiqlarini idrok etgan sari, insonning ma’naviy olami boyiydi.
