Nazarboyevning qizi Qozog‘iston prezidentligiga o‘z nomzodini qo‘ymaydi
Qozog‘iston parlamenti senati (yuqori palatasi) spikeri, mamlakat birinchi prezidenti Nazarboyevning qizi Darig‘a Nazarboyeva mamlakatda 9 iyun kuni muddatdan oldin bo‘lib o‘tadigan prezidentlik saylovida o‘z nomzodini qo‘yishni rejalashtirmayapti. Bu haqda uning yordamchisi Saula Mustafoyeva tengrinews.kz.ga xabar berdi.
«Yo‘q, Darig‘a Nursultonovna o‘z nomzodini qo‘yishni rejalashtirmayapti», - deya xabar bergan Mustafoyeva.
Ma’lumot uchun: Darig‘a Nazarboyeva Qozog‘iston birinchi prezidenti Nursulton Nazarboyevning to‘ng‘ich qizi.
Eslatib o‘tamiz, bugun mamlakat prezidenti To‘qayev Qozog‘iston prezidenti lavozimi uchun muddatdan oldingi saylovlar 9 iyun kuni bo‘lib o‘tishi haqida ma’lum qildi.
