Nobel mukofoti sovrindori Nargis Muhammadiy Eronda yetti yarim yilga qamaldi
Hukm 7 fevral kuni Mashhad shahri sudi tomonidan chiqarildi.
«U yig‘ilishlar o‘tkazish va til biriktirish uchun olti yilga, targ‘ibot uchun yana bir yarim yilga qamaldi, shuningdek, ikki yilga mamlakatdan chiqish taqiqlandi», — dedi eronlik huquq himoyachisi, advokat Mustafo Nili.
Muhammadiyga qo‘shimcha ravishda Tehrondan taxminan 740 kilometr janubi-sharqda joylashgan Xosf shahriga ikki yillik ichki badarg‘a jazosi ham berilgan.
Tarafdorlarining aytishicha, dekabr oyida norozilik namoyishi vaqtida hibsga olingan Muhammadiy 2 fevraldan beri ochlik e’lon qilgan.
Faoliyati yillari davomida Nargis Muhammadiy 13 marta hibsga olingan va besh marta qamoq jazosiga hukm qilingan. 2022 yil yanvarda u «davlatga qarshi targ‘ibot» va Saudiya Arabistoni foydasiga josuslik ayblari bilan sakkiz yilga qamalgan. 2023 yil avgustda jazo muddati yana bir yilga uzaytirilgan.
O‘sha yilning o‘zida Muhammadiy Eronda ayollar zulmiga qarshi kurashi, shuningdek, barcha uchun inson huquq va erkinliklarini ilgari surgani bois Nobel mukofotiga sazovor bo‘lgan. 2024 yil dekabrda esa tibbiy sabablarga ko‘ra vaqtincha ozodlikka chiqarilgan.
