Ozarbayjonda o‘zbek ijodkorining kitob taqdimoti o‘tkazildi

Yaqinda Samarqandda bo‘lib o‘tgan Turkiy davlatlar tashkilotiga a’zo davlatlar rahbarlarining sammitida O‘zbekiston-Ozarbayjon aloqalari mustahkamligi va maqsadlar mushtarakligi yana bir bor namoyish etildi.

Ushbu nufuzli tadbirda tuzilgan madaniy aloqalar samarasi o‘laroq, Ozarbayjonda O‘zbekiston va Qoraqalpog‘iston Yozuvchilar uyushmasi a’zosi, shoir O‘lmasbek Xo‘jayevning “Nizomiy Ganjaviy va Alisher Navoiy asarlarida kommunikatsiyaviylik xususiyatlar talqini” kitobining taqdimoti o‘tkazildi.

Ushbu taqdimot tadbirlari Boku davlat universiteti, A.Karim nomidagi Shimg‘oyat ijod uyi, Ozarbayjon Milliy Fanlar akademiyasi hamda Ganja regional madaniyat idorasida tashkil etildi. Taqdimotda kitob muallifi O‘.Xo‘jayev hamda Ozarbayjon Milliy Fanlar akademiyasi Nizomiyshunoslik shu’basining mudiri Nushoba Orosli asarning tarixiy va bugungi ahamiyati, o‘zbek-ozarbayjon do‘stligi, o‘zaro ijodiy aloqalarning davom etayotgani haqida gapirdi.

Taqdimot ishtirokchilari Ganja shahriga borib, ulug‘ mutafakkir, shayx Nizomiy Ganjaviy qabrini ziyorat qildi. Nizomiy Ganjaviy nomidagi uy-muzeyda bo‘lishdi.