O‘zbekiston Jurnalistlari ijodiy uyushmasi raisi, taniqli shoir Sa’dulla Hakim vafot etdi
Sa’dulla Hakimov 1951 yilda Jizzax viloyati Forish tumanida tug‘ilgan.
1977 yilda O‘zbekiston Milliy universitetining jurnalistika fakultetini tamomlagan.
2002 yilda «O‘zbekiston Respublikasida xizmat ko‘rsatgan madaniyat xodimi» faxriy unvoni bilan taqdirlangan.
Mehnat faoliyatini G‘allaorol tumanida o‘qituvchilikdan boshlagan. "O‘zbekistonda sotsial ta’minot” jurnali mas’ul kotibi, «O‘zbekiston adabiyoti va san’ati» gazetasi bo‘lim mudiri, «O‘zbekiston ovozi» gazetasi bo‘lim mudiri, «O‘zbekiston adabiyoti va san’ati» gazetasi mas’ul kotibi, «Ma’rifat» gazetasi bosh muharriri, O‘zbekiston Respublikasi Prezidenti devoni Axborot markazi rahbarining o‘rinbosari, rahbari, O‘zbekiston Milliy axborot agentligi bosh direktorining o‘rinbosari, «Turkiston-press» nodavlat axborot agentligi bosh direktori, «O‘zbekiston adabiyoti va san’ati» gazetasi bosh muharriri lavozimlarida ishlagan.
2016 yilning 29 dekabridan O‘zbekiston Jurnalistlari ijodiy uyushmasi raisi lavozimida ishlab kelayotgan edi.
Zarnews.uz hamda "Zarafshon" va "Samarkandskiy vestnik" gazetalari birlashgan tahririyati marhumning oila a’zolari va yaqinlariga ta’ziya izhor etadi.
