Professor-o‘qituvchilar maktab o‘quvchilarini zarur metodik qo‘llanmalar bilan ta’minlaydi
Kecha Toshkent davlat agrar universiteti Samarqand filiali professor-o‘qituvchilari Urgut tumanidagi 143-, 145-, 150-umumiy o‘rta ta’lim maktablari biologiya va matematika fani o‘qituvchilari ishtirokida master-klass mashg‘ulotlari tashkil etdi. Olib borilgan mashg‘ulotlarda maktablardagi fan o‘qituvchilarning bilimini boyitish, darslar davomida o‘quvchilarga fanning murakkab jihatlarini tushuntirish, yangi pedagogik texnologiyalarga keng e’tibor qaratildi.
Fundamental fanlar kafedrasi mudiri, dotsent Yigitali Toshpo‘latov va kafedra o‘qituvchisi Eldor Isomovlar maktabda biologiya fanidan bo‘lib o‘tgan ochiq darsda qatnashib, o‘quvchi-yoshlarning fanga bo‘lgan qiziqishi yuqoriligini, o‘qituvchining bergan savollariga dadil javoblarini hamda aksariyat o‘quvchilar qo‘shimcha savollar ham berayotganini e’tirof etdi.
Kafedra o‘qituvchisi Sharof Kenjayev 8-sinfda o‘tilgan algebra darsini tahlil qilish davomida o‘qituvchining yutuqlari bilan bir qatorda, yo‘l qo‘yilgan kamchiliklarini ham keltirib o‘tdi.
Filial professor-o‘qituvchilari maktab o‘qituvchilarining ochiq darslarini tashkil etish, ularning samaradorligini oshirish, yo‘l qo‘yilayotgan metodik nuqsonlarni bartaraf etish, yosh, tajribasi kam o‘qituvchilarga filialning malakali pedagog-olimlari bilan “Ustoz-shogird” tizimida faoliyat olib borishini tashkil etish yuzasidan amaliy ishlar muhokama qilindi.
Mazkur maktablarda 2020-2021 o‘quv yilida 120 nafardan ortiq bitiruvchi o‘quvchilar mavjud. Ular bilan ochiq suhbat chog‘ida qaysi oliy o‘quv yurtlariga hujjat topshirmoqchi ekanligi, ularni hozirda qiynab kelayotgan masalalar, maktab va ota-onalar o‘rtasidagi o‘zaro aloqaning samaradorligi yuzasidan qilinishi lozim bo‘lgan ishlar kelishib olindi. Filial professor-o‘qituvchilari bitiruvchi o‘quvchilarni oliy o‘quv yurtlariga kirish imtihonlarida qo‘llaniladigan test savollari, mashq va masalalar to‘plami kabi metodik qo‘llanmalar bilan ta’minlaydigan bo‘ldi.
Toshkent davlat agrar universiteti Samarqand filiali axborot xizmati.
