Qo‘lga tushmas qor odamlari: ular haqiqatda bormi?
Yaqinda Hindiston armiyasining harbiylari Himolay tog‘larida «qor odam»ning sirli izlarini topishganligini e’lon qildilar.
Hindiston mudofaa vazirligining ma’lumotlarida, harbiy ekspeditsiya alpinistlari «dunyo tomi» - Himolay tog‘lariga ko‘tarilganlarida sirli «qor odam»ning izlarini ko‘rganliklari haqida qayd qilingan. Ekspeditsiya a’zolari Nepaldagi balandligi jihatidan jahonda beshinchi o‘rinda turuvchi Makalu cho‘qqisida bo‘lganlarida 81×38 santimetrdan ham yirikroq bo‘lgan oyoq izlarini ko‘rishgan. Ammo, qator tadqiqotlar o‘tkazib aniq ma’lumotlarga ega bo‘lishmasdan ommaga xabar bermaslikka qaror qilishdi. Nihoyat, tekshiruvlar qordagi sirli izlar Himolay tog‘larida odamga o‘xshash mavjudot - «yeti»larga tegishli ekanligini isbotlashdi.
Mahalliy hind jurnalistlarining xabarlariga qaraganda, noma’lum izlar suratga olinib, tadqiqot olib borish maqsadida soha olimlari qo‘liga topshirilgan. Ammo, harbiylar boshqalarning ham e’tiborini jalb qilish uchun qor odamning fotosuratlarni e’lon qilishdi. Suratlarni ko‘rganlarning aksariyati «yeti»ning oyog‘i bitta bo‘lib, sakrab-sakrab harakatlangan yoki xuddi model qizlarga o‘xshab oyoqlarini bir chiziqda tashlab yurgan, degan fikrda. Boshqalari esa qor odamlarning borligini isbotlaydigan ishonarli dalil va isbot qilinmaganligini iddao qilishgan. Eng ko‘p bildirilgan fikrlar esa bir nechta mutaxassislar sirli izlar topilgan joylarni qaytadan borib o‘rganishni taklif qilishgan.
- Bu qo‘lga tushmas qor odamlarini Makalu-Barun milliy bog‘i hududida ilgari ham bir marta ko‘rishgan edi, - deyiladi hind harbiylari tarqatgan ma’lumotda.
Dunyoning turli burchaklarida qor odamni ko‘rganliklari haqida tez-tez xabarlar tarqaladi. Masalan, AQShda 1921 yildan to 2013 yilgacha bo‘lgan davrda 3313 ta xuddi shu kabi voqealar bo‘lganligi qayd qilingan. Ammo, ko‘psonli ekspeditsiyalar tashkil etilib, ilmiy-tadqiqot ishlari olib borilgan bo‘lsa-da, olimlar «yeti»larning borligini isbotlovchi aniq dalillar topa olishmagan. Zora, kinofilmlar ishlashda jahonda birinchi o‘rinda turgan hindlar qor odamni topishda ham birinchi bo‘lsa qaniydi?
Xo‘sh, siz nima deysiz rostdan ham qor odam bormi?
Dilmurod TO‘XTAYeV tayyorladi.
