Samarqand tumanida sodir bo‘lgan yong‘in bo‘yicha rasmiy ma’lumot berildi
Bugun, 19 may kuni Samarqandda bir-biriga tutash 5 ta xonadonda yong‘in bo‘lgani haqida xabarlar tarqaldi.
Viloyat favqulodda vaziyatlar boshqarmasi ma’lumotiga ko‘ra, bugun soat 03:51 da Samarqand tumani Jo‘yisoy mahallasidagi xonadonlarda yong‘in sodir bo‘layotgani to‘g‘risida tuman FVBga xabar kelib tushgan.
Voqea joyiga 7 ta yong‘in-qutqaruv ekipaji va «KamAZ» yordamchi avtomashinasi jalb etilgan. Yong‘in chiqayotgan joyga soat 04:06 da yetib borilgan va soat 05:38 da yong‘in bartaraf etilgan.
Yong‘in oqibatida 5 ta xonadonning taxminan 490 metr kvadrat maydondagi shift va tom qismi hamda uy jihozlari yonib, zararlangan. Hodisa oqibatida halok bo‘lgan va jabrlanganlar yo‘q.
Hozirda tergovga qadar tekshirish ishlari olib borilmoqda.
