Xalqaro kuzatuvchilar 7-Samarqand saylov okrugida bo‘lishdi

7-Samarqand saylov okrugiga YeXHTning Demokratik institutlar va inson huquqlari bo‘yicha byurosining xalqaro kuzatuvchilari tashrif buyurdi. 

Uzoq muddatli kuzatuvchilar Alessandro Bartolini hamda Lela Taliurilar okrug saylov komissiyasi faoliyati bilan yaqindan tanishib, komissiya a’zolari bilan suhbatlashdi. Okrug komissiyasi a’zolari tomonidan olib borilayotgan ishlar, saylov jarayoni bilan bog‘liq masalalarga e’tibor qaratildi.  

- Okrug va uchastka saylov komissiyalarining ayni kunlardagi faoliyati, qonun normalarining amalda qanday ishlayotgani bilan qiziqdik, - deydi Alessandro Bartolini. – Shuningdek, saylov uchastkalari qay tariqa tashkil etilgani, ularning a’zolari olib borayotgan faoliyat, saylovchilar ro‘yxatini shakllantirish jarayoni, avvalgi yillarda o‘tkazilgan saylovlardagi saylovchilar bilan bu yilgi saylovchilar soni orasida tafovutlar haqida aniq ma’lumotlarga ega bo‘ldik. 

Kuzatuvlarimiz jarayonida hududlardagi saylov uchastkalari faoliyati, shuningdek, nomzodlar, ularning ishonchli vakillarining saylovchilar bilan uchrashuvlarida ham qatnashishni rejalashtirganmiz.