Xitoydan qaytarilgan fuqarolarimiz uchun qanday sharoitlar yaratilgan?
Xabaringiz bor, Xitoydan uchta charter reys orqali yurtimizga olib kelingan fuqarolar Jahon sog‘liqni saqlash tashkiloti tavsiyasiga ko‘ra, 14 kun davomi (kasallikning yashirin davri)da tibbiy kuzatuvga olish maqsadida maxsus tayyorlangan muassasalarga joylashtirildi.
Ularning ayni paytda yashab turgan sharoitlari haqida Sog‘liqni saqlash vazirligi jamoatchilik bilan aloqalar bo‘limi ma’lum qildi.
Ushbu muassasalarga joylashgan fuqarolar bu yerdagi yaratilgan shart-sharoitlardan mamnun. Misol uchun, “Bo‘ston” sanatoriysiga joriy yil 4 fevral kuni Xitoyning Pekin shahridan olib kelingan 250 nafar fuqaro joylashtirildi. Mazkur tadbirlarga tegishli tartibda kasbiy tayyorgarlikdan o‘tkazilgan sohaning yetakchi va tajribali mutaxassislari jalb etildi.
Ma’lumki, “Bo‘ston” sanatoriysi mamlakatimizdagi dam oluvchilar uchun barcha qulaylikka ega va yetarli shart-sharoitlar bilan ta’minlangan sihatgohlardan biri hisoblanadi.
– Xitoydagi nufuzli universitetda o‘qiyman. Koronavirus epidemiyasi tufayli, ochig‘i, boshida judayam xavotirlandim. Shunday qiyin paytda Prezidentimiz tashabbusi bilan charter reysi tashkil etilganligini eshitib, ko‘nglim yumshab ketdi, – deydi navoiylik Mehriddin Zoirov. – Biz joylashgan muassasada barcha zaruriy sharoitlar yaratilgan, o‘rin-joylar, oziq-ovqatlar, zarur dori-darmonlar, diagnostika, dezinfeksiya, shaxsiy himoya va gigiyena vositalari bilan ta’minlangan. Kelgan fuqarolarning kiyimlarini sifatli yuvish uchun kirxona, tibbiy anjomlarni sterilizatsiyadan o‘tkazish uchun alohida punkt va avtotransportlar uchun dezinfeksiya maydoni va dezinfeksion vositalar zaxirasi yaratilgan.
Darhaqiqat, tibbiy kuzatuvdagi fuqarolarimizni termometriyadan o‘tkazish, niqoblarni o‘z vaqtida almashtirish va xonalarni shamollatish hamda namli tozalash ishlarini o‘tkazilishi malakali epidemiologlar tomonidan nazoratga olingan. Yuqumli kasalliklar shifokorlari tomonidan ikki mahal tibbiy ko‘rik o‘tkazilmoqda.
– Epidemik vaziyat beqaror hududdan yurtimizga olib kelishgani uchun Prezidentimizga, barcha tashkilotchilarga chuqur minnatdorchilik bildiraman, – deydi poytaxtlik Farruh Ismatullayev. – Ayni paytda sog‘ligimizda hech qanday muammo yo‘q, axir sanatoriyda dam olyapmiz. Bu yerda bo‘sh vaqtimizni samarali o‘tkazish uchun kutubxona tashkil etildi. Sport bilan shug‘ullanish uchun ham barcha sharoit yaratildi. Shuningdek, dezinfektor mutaxassislar tomonidan kuniga ikki mahal yotoqxonalar, vannaxonalar va oshxona zararsizlantirilmoqda. Oshxonada ishlatilgan idish-tovoqlarni zararsizlantirish ishlariga ham alohida e’tibor qaratilmoqda.
Shu o‘rinda ta’kidlash joizki, koronavirus infeksiyasining yurtimizga kirib kelishining oldini olish borasida tizimli choralar ko‘rilmoqda. Jumladan, Xitoy bilan O‘zbekiston o‘rtasidagi aviaqatnovlar vaqtincha to‘xtatilgan. Koronavirus infeksiyasi qayd etilgan davlatlardan kelayotgan yo‘lovchilar 12 ta aeroport, 5 ta temir yo‘l hamda davlat chegaralarini kesib o‘tish joylaridagi 53 ta sanitariya-karantin punktlarida tibbiy ko‘rikdan o‘tkazilmoqda.
Eslatib o‘tamiz, yo‘lovchilarning vaqtincha turar-joy markazlari yuzasidan Sog‘liqni saqlash vazirligi Sanitariya-epidemiologik osoyishtalik agentligining bosh ofisining +998 (71) 276-49-66 telefon raqamiga murojaat qilishingiz mumkin. Bundan tashqari, Toshkent davlat stomatologiya instituti ma’muriyati binosida (eski ToshMI) call – markaz tashkil etilib, unda Xitoydan olib kelingan vatandoshlarimiz o‘z oila a’zolari, yaqinlari bilan 30 ga yaqin video konferensiya aloqalari yordamida to‘g‘ridan–to‘g‘ri muloqot qilishlari mumkin.
