Xorijdan kelgan ayrim fuqarolarda qizamiq kasalligi aniqlanmoqda

Jahon Sog‘liqni saqlash tashkiloti ma’lumotlariga ko‘ra, emlashdan bosh tortganlar hisobiga, 2023 yilda dunyoda va Yevropa mintaqasida qizamiq bo‘yicha epidemiologik vaziyat keskinlashdi.

Ayni paytda Ukrainada 23 070, Serbiyada 4 954, Fransiyada 2 576 , Gretsiyada 2 476, Italiyada 2 020, Rossiyada 1 396, Gruziyada 1 128 holatda qizamiq kasalligi qayd etilgan.

Qo‘shni mamlakatlar Afg‘onistonda 2023 yilning hozirgacha bo‘lgan davrida 2 105 holatda, Tojikistonda esa 300 dan ortiq Qozog‘istonda 169 ta holat qayd etilgan.

Sanepidqo‘mita Axborot xizmati bergan ma’lumotga ko‘ra, respublikamizda joriy yilning iyul oyi holatiga ko‘ra, qizamiq kasalligiga shubha qilingan 306 nafar bemorning qon namunalari virusologik laboratoriyaga yuborilgan. Ulardan 164 tasida qizamiq aniqlangan.

Shuni alohida ta’kidlab o‘tish joizki, mamlakatimizda qizamiq bilan kasallanish holatlari asosan xorijdan kelgan qizamiq bilan kasallanganlar bilan aloqada bo‘lgan fuqarolar orasida aniqlanmoqda, deyiladi qo‘mita ma’lumotida.