Yo‘llar xalq farovonligiga xizmat qilishi kerak

Samarqand viloyati hokimligida joriy yilda yo‘llar qurilishi bo‘yicha amalga oshirilishi zarur bo‘lgan loyihalar muhokama qilindi.

Viloyat hokimi rahbarligida o‘tkazilgan muhokamada “Umumiy foydalanishdagi avtomobil yo‘llarini qurish va rekonstruksiya qilish direksiyasi”, “Ko‘prik qurilish ta’mirlash” va “Mintaqaviy yo‘llarga buyurtmachi xizmati” davlat unitar korxonalari hamda viloyat hokimligi injiniring kompaniyalari buyurtmasi asosida Samarqand shahri va Payariq tumanida amalga oshirilishi belgilangan 33 ta loyiha atroflicha ko‘rib chiqildi.

Har bir loyiha muhokamasida yo‘l qurilishiga qadar kommunikatsiya tarmoqlari holati inventarizatsiyadan o‘tkazilishiga, zarur hollarda birinchi navbatda barcha tarmoqlar yangilanishini ta’minlashga, shuningdek, yo‘l infratuzilmasini, ayniqsa, mahallalar ichidagi ko‘chalarni saqlash, ta’mirlash va rekonstruksiya qilishga alohida e’tibor qaratilishi ta’kidlandi.

- Yo‘llar, avvalo, Samarqand xalqi farovonligiga xizmat qilishi kerak, - dedi Erkinjon Turdimov. – Buning uchun esa sifat bosh mezon bo‘lishi shart.

Muhokama yakunida barcha loyihalar yana bir bor ko‘rib chiqilib, zaruriy tuzatish kiritish maqsadida qayta ishlashga yo‘naltirildi.

Samarqand viloyati hokimligi axborot xizmati.