Yozda elektr yetishmovchiligi oldini olish uchun issiqlik energiya stansiyalariga hozirgidan 6 million kub metrga ko‘p gaz yetkazib berish vazifasi qo‘yildi
Prezident ishtirokidagi yig‘ilishda yoz oylarida elektr tizimlarining barqaror va uzluksiz ishlashini ta’minlash, yuklama oshib ketishi natijasida ularning ishdan chiqishini oldini olish choralarini o‘z vaqtida ko‘rib borish zarurligi ko‘rsatib o‘tildi.
Past kuchlanishli 30 ming kilometr elektr tarmog‘i va 10 mingta transformatorni mukammal ta’mirlash ishlarini o‘z vaqtida va sifatli bajarish topshirildi.
Viloyatlar hokimlariga elektr uskunalari va materiallari zaxirasi uchun ehtiyojlarni hisob-kitob qilib, har bir viloyatda 10 milliard so‘mdan mablag‘ ajratish topshirildi.
1 avgustga qadar 2023 yil uchun reja qilingan tarmoq va transformatorlarni ta’mirlash ishlarini yakuniga yetkazish vazifasi qo‘yildi. Buning uchun viloyat, shahar va tumanlarda 400 ga yaqin brigada tashkil qilinadi.
Shuningdek, mutasaddilarga issiqlik energiya stansiyalariga bugungi kunga nisbatan 6 million kub metrga ko‘p gaz yetkazib berishni ta’minlash, 1 iyulga qadar 200 ming tonna mazut zaxirasini yaratish topshirildi.
Yoqilg‘i-energetika sohasida davlat nazoratini kuchaytirish, elektr energiyasi va gazning noqonuniy iste’moliga barham berish bo‘yicha ham vazifalar belgilab berildi.
