YUNESKO 43-sessiyasi: Samarqand madaniy merosi dunyo e’tiborida bo‘ladi
Shu yilning 30 oktyabridan 13 noyabriga qadar Samarqand shahrida BMTning Ta’lim, fan va madaniyat masalalari bo‘yicha tashkiloti — YuNESKO Bosh konferensiyasining 43-sessiyasi bo‘lib o‘tadi.
YuNESKO va mamlakatimiz rahbariyati, viloyat hokimligi hamda mas’ul boshqarma va tashkilotlar tomonidan mazkur tadbirga qizg‘in tayyorgarlik ko‘rilmoqda. Xususan, viloyat madaniy meros boshqarmasi tomonidan xalqaro forum doirasida tashrif buyurishi mumkin bo‘lgan yuqori martabali mehmonlar uchun viloyatdagi 14 ta diqqatga sazovor madaniy meros ob’yekti ro‘yxati shakllantirilib, ularni shay holatga keltirish ishlari boshlangan.
Samarqand mintaqaviy restavratsiya markazi direktori Bahrillo Abdullayevning ta’kidlashicha, anjuman Samarqand shahrida o‘tkazilayotgani munosabati bilan shahar markazida joylashgan Registon majmuasi, Amir Temur maqbarasi va Shohi Zinda majmuasi mehmonlar tashrifi uchun asosiy manzillar sifatida belgilangan.
– Hozirgi vaqtda mazkur yodgorliklarda ta’mirlash, tiklash va obodonlashtirish ishlari davom etmoqda, – deydi B.Abdullayev. – Jumladan, Registon amajmuasidagi Mirzo Ulug‘bek madrasasining to‘rtta darsxonasi va katta galereyasida ta’mirlash hamda koshinkorlik ishlari amalga oshirilmoqda. Tillakori va Sherdor madrasalarining ko‘rgazma zallari ham qayta ta’mirlanib, zamonaviy ekspozitsiyalar bilan boyitilmoqda.
Xalqaro darajadagi tadbirga tayyorgarlik doirasida Shohi Zinda majmuasida ham keng ko‘lamli konservatsiya va restavratsiya ishlari amalga oshirilmoqda. Buning uchun “Vaqf” xayriya jamoat fondi tomonidan 1 milliard so‘mdan ziyod mablag‘ ajratilgan.
– Madaniy meros agentligi ilmiy kengashining xulosasiga asosan, ziyoratgohga tashrif buyuruvchi mahalliy va xorijiy sayyohlar, shuningdek, mehmonlar uchun qulay sharoit yaratish, ularni munosib kutib olish va xavfsizligini ta’minlash maqsadida hozirgacha 700 million so‘mlik restavratsiya va konservatsiya ishlari bajarildi, - deydi Shohi Zinda majmuasi rahbari Samariddin Mirzayev. – Xususan, majmuaning fasadi, bino devorlaridagi qadimiy yozuvlar va dekorativ bezaklar qayta ta’mirlanib, ranglandi. Ziyoratgoh atrofi obodonlashtirilib, xavfsizlik to‘siqlari o‘rnatildi va nogironligi bo‘lgan shaxslar uchun qulayliklar yaratildi.
YuNESKO Bosh konferensiyasining 43-sessiyasi O‘zbekiston uchun ulkan tarixiy voqea bo‘ladi. Ushbu anjuman orqali mamlakatimizning xalqaro maydondagi nufuzi oshadi, ayniqsa, ko‘hna kentning boy madaniy merosi jahon hamjamiyati e’tiborida bo‘ladi.
Ma’lumot uchun: YuNESKOning Umumjahon merosi ro‘yxatiga kiritilgan Samarqand tarixiy markazi 1123 gektar va uning muhofaza zonasi 1369 gektarni tashkil etadi.
Viloyatda 1607 ta moddiy madaniy meros ob’yektlari ro‘yxatga olingan bo‘lib, yodgorliklarning 973 tasi arxeologiya, 564 tasi arxitektura ob’yektlari, 36 tasi monumental san’at asarlari va 34 tasi diqqatga sazovor joylardir.
Fazliddin RO‘ZIBOYeV.
