Самарқанддаги театр жамоаларига автобус совға қилинди

Самарқанд вилоят ҳокимлиги ташаббуси билан вилоятда фаолият юритаётган театр жамоаларига "Isuzu" автобуслари совға қилинди.

Самарқанд вилоят мусиқали драма театри қаршисида ташкил этилган тантанали тадбирда Самарқанд вилояти ҳокими Э.Турдимов ҳамда давлат ва жамоат ташкилотлари вакиллари мамлакатимизда театр санъатини равнақ топтириш борасидаги эзгу саъй-ҳаракатлар аҳоли, айниқса ёш авлод маънавиятини юксалтириш, уларни мустақил ва соғлом тафаккур соҳиби бўлиб камолга етказишда муҳим аҳамият касб этишини таъкидладилар.

Шундан сўнг вилоятдаги мавжуд тўртта театр жамоаси раҳбарларига автобус калитлари топширилди.

Тадбир давомида, шунингдек, Самарқанд вилоят мусиқали драма театри фаолияти билан танишиб, бу ерда қилиниши лозим бўлган ишлар юзасидан мутасадди раҳбарларга зарур топшириқлар берилди.

– Жамоамиз билан гастрол сафарларида кўп бўламиз, – дейди Каттақўрғон шаҳар драма театри директори Отабек Мардонов. – Бунда янги автобуснинг хизмати алоҳида. 2002 йилда берилган автобусимиз бор, аммо таъмирталаб. Оқибатда анча қийинчиликка дуч келардик. Энди нафақат қўшни туманлар, балки қўшни вилоятларга ҳам бемалол гастрол сафарлари уюштириб, кўчма спекталлар намойиш этиш имкониятимиз кенгайди.

Бахтиёр МУСТАНОВ.