ОАВ: АҚШ ва Эрон келишув бўйича муросага яқинлашди

АҚШ ва Эрон ўртасидаги музокараларда 60 кунлик ўт очишни тўхтатиш режимини узайтириш, Ҳурмўз бўғозини очиш ва Теҳроннинг бойитилган уран захираларидан воз кечишни назарда тутувчи рамкавий келишув бўйича муҳим келишувга эришилди.

Манбаларга кўра, томонлар ҳужжатнинг асосий қисмини келишиб олган. Бироқ якуний ҳужжатлар ҳали имзоланмаган, Эрон ҳукумати эса ҳозирча сўнгги розиликни бермаган.

Дастлабки келишувларга мувофиқ, меморандум имзолангандан кейин Эрон Ҳурмўз бўғозини очиши ва 30 кун ичида кемалар ҳаракатини аввалги ҳажмда тиклаши керак бўлади. Шунингдек, Ливанни ҳам ўз ичига олган барча фронтларда жанговар ҳаракатларни тўхтатиш режалаштирилмоқда.
The Washington Post ёзишича, келишув лойиҳасига кўра, Эрон ядровий қурол яратмаслигини расман тасдиқлайди ва бойитилган уран захираларини йўқ қилишга розилик беради. Бу жараён механизми келаси икки ой ичида келишиб олиниши кутилмоқда.

Бундан ташқари, Эроннинг 12 миллиард долларлик активларини музлатишдан чиқариш ва АҚШ томонидан амалга оширилган денгиз блокадасини бекор қилиш ҳам муҳокама қилинмоқда.
Аввалроқ Fox News телеканали келишув тахминан 95 фоизга тайёр эканини хабар қилган эди. Унда АҚШ президенти Дональд Трамп эса якуний келишувларга ҳали тўлиқ эришилмаганини айтди ва битимни имзолашга шошилмасликни буюрган.