Ёшлар фестивалида ўқувчилар "Вилоят ҳокими олимпиадаси"да қатнашди

Самарқандда бўлиб ўтаётган "Янги Ўзбекистон ёшлари, бирлашайлик!" шиори остидаги вилоят ёшлар фестивали доирасида олий таълим муассасаларида умумтаълим муассасаларининг 10-синф ўқувчилари ўртасида 14 та фандан "Вилоят ҳокими олимпиадаси" ўтказилмоқда.

Хусусан, Самарқанд ветеринария медицинаси, чорвачилик ва биотехнологиялар университетида ўқувчилар биология фани бўйича ўз билимларини синовдан ўтказмоқда.

— Бу каби тадбирлар биз, ёшларни янада жипслаштириб, ўз иқтидоримизни намойиш қилишга имкон беради, - дейди Тойлоқ туманидаги 30-умумтаълим мактаби ўқувчиси Маржона Қаҳҳорова. – Жараёнда тўплаган тажрибамиз республика ва халқаро олимпиадаларда асқотади. Ташкилотчиларга миннатдорчилигимизни билдирамиз.

Шунингдек, университетда “Мунозара” интеллектуал ўйинининг вилоят босқичи ўтказилмоқда. Унинг ғолиблари "Заковат" баҳсининг кейинги босқичларига йўлланма олади.