9-11 май кунлари айрим жойларда сел келиш хавфи эълон қилинди
Республика Гидрометеорология хизмати агентлиги тақдим этган тезкор маълумотга кўра, шу йилнинг 9-11 май кунлари Ўзбекистон ҳудуди бўйича вақти-вақти билан ёмғир ёғади, баъзи жойларда кучаяди, момақалдироқ бўлиши мумкин.
Республика бўйича шамол тезлиги 15-20 м/с гача кучайиши кутилмоқда, айрим жойларда чанг-тўзонлар билан кузатилади. 9-12 май кунлари кутилаётган кучли ёмғирлар ёғиши сабабли, республиканинг тоғ олди ва тоғли ҳудудларида, жумладан, вилоятимизнинг Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой, Иштихон туманларида сел, сув тошқин ҳодисалари юзага келиши мумкин.
Шундан келиб чиқиб, тоғ олди ва тоғли ҳудудларда истиқомат қилувчи фуқаролар, дам олувчилар ҳамда тоғли ҳудудларда ҳаракатланувчи ҳайдовчилардан эҳтиёткорлик чораларини кўришлари сўралади. Содир бўлиши мумкин бўлган фавқулодда вазиятларнинг олдини олиш ва юзага келганда уларнинг оқибатларини бартараф этиш ҳамда хавфсизликни таъминлаш мақсадида барчадан ҳушёрлик талаб этилади.
9-11 май кунлари вилоят, шаҳар ва туманлар фавқулодда вазиятлар бошқарма ва бўлимлари ҳамда унинг ҳудудий қуйи тизимига кирувчи куч ва воситаларининг 24 соатлик навбатчилиги ташкил этилади.
Агарда жойларда сел ва сув тошқини оқибатлари билан боғлиқ ҳолатлар кузатилса, вилоят фавқулодда вазиятлар бошқармасининг (66) 240-06-01, (66) 240-06-02 ҳамда қисқа 1050 ва 101 телефон рақамлари орқали тезкор бошқарув марказининг навбатчи-диспетчерлик хизматига қўнғироқ қилишингиз мумкин.
