Banklarda bo‘sh ish o‘rinlari yo‘q ekan
Samarqand davlat universitetida “Karera kuni” tadbiri tashkil etildi. Shu yilning o‘zida 8 ming nafarga yaqin yangi kadrlarni mehnat bozoriga olib kirayotgan oliygoh uchun bu muhim tadbir.
Raqamlar ham shunga yarasha. Ma’lumotga ko‘ra, shu tadbirning o‘zida 61 ta korxona-tashkilot 700 dan ortiq ish o‘rinlari bilan ishtirok etgan. Shundan 300 tasi davlat korxonalari, qolgani xususiy sektordagi bo‘sh ish o‘rinlari. Tadbir davomida 700 nafarga yaqin talabalar ish beruvchilar bilan uch tomonlama shartnomalarni imzolagan. Bu raqam keyinchalik yana ortishi mumkin. Sababi tadbirning asosiy maqsadi ish beruvchi hamda bitiruvchilar o‘rtasida aloqa ko‘prigini yaratish.
Ammo, bir holat e’tiborimizni tortdi. Gap unda ishtirok etgan banklar haqida. “Xalq banki” viloyat filiali xodimlaridan ma’lumot olmoqchi bo‘lganimizda, ular tashkilotida bo‘sh ish o‘rni yo‘qligini, bitiruvchilarga faqat ko‘rsatayotgan xizmatlari haqida gapirib berganini aytishdi. "Asia Alliance Bank" aksiyadorlik tijorat banki viloyat filialidan ham shunday javobni oldik.
Turonbank aksiyadorlik tijorat banki viloyat filiali xodimi esa faqat nogironlar uchun ish o‘rni borligini, lekin uni ham kadrlar bo‘limi rahbariga uchrashib, hal qilish kerakligini ma’lum qildi. Umumiy hisobda banklar tadbirga faqat o‘z xizmatlari va kredit turlarini reklama qilish uchun kelgan bo‘lib chiqyapti. Bunday holatni oldingi mehnat yarmarkalarida ham boshqa tashkilotlarda kuzatganmiz.
Savol tug‘iladi: mehnat yarmarkalari o‘zi nima uchun o‘tkazilyapti? Hisobot uchunmi yoki ishsizlarni ishli qilish uchun? Nega bank tizimi o‘zidagi bo‘sh ish o‘rinlarini ko‘rsatmayapti? Holbuki, qonunchilikda tashkilotlarning ijtimoiy muhofazaga muhtoj, ish topishda qiynalayotgan va mehnat bozorida teng shartlarda raqobatlasha olmaydigan shaxslarni ishga joylashtirish uchun ish o‘rinlarining eng kam sonini belgilash va zaxiraga qo‘yishi belgilangan. Holatga viloyat kambag‘allikni qisqartirish va bandlik bosh boshqarmasi hamda Markaziy bankning viloyat bosh boshqarmasi mas’ullari munosabat bildiradi, degan umiddamiz.
Asqar BAROTOV.
