Bugun Xalqaro bolalarni himoya qilish kuni

Ushbu sana 73 yildan buyon butun dunyoda bayram qilib kelinadi.

O‘z bolangni o‘zing asra!

Turli-tuman savdolardan,
Yovuz niyat g‘avg‘olardan,
Oqimlardan, balolardan,
O‘z bolangni o‘zing asra!

Hayot – sinov, emas o‘yin,
Nafsingga egmagin bo‘yin,
Ko‘rmoq bo‘lsang uning to‘yin,
O‘z bolangni o‘zing asra!

Vatan - ko‘zing qarog‘idir,
Sevgi - dilning so‘rog‘idir,
Farzand - uyning chirog‘idir,
O‘z bolangni o‘zing asra!

Ne bor oiladek aziz,
Umr farzand bilan laziz,
Kelajakka solguchi iz,
O‘z bolangni o‘zing asra!

Chayqalib turibdi jahon,
Nur va zulmat jangda hamon,
Qolsin desang nasling omon,
O‘z bolangni o‘zing asra!

Nelarni ko‘rmadi boshing,
Oyog‘ingdan chaldi loshing,
Porlasin desang quyoshing
O‘z bolangni o‘zing asra!

Ishonmagin yolg‘onlarga,
Yot ellarda qolg‘onlarga,
Yurtga og‘u solg‘onlarga,
O‘z bolangni o‘zing asra!

Ogohlikni berma qo‘ldan,
Og‘ishmagin to‘g‘ri yo‘ldan,
Xavf-xatar bor o‘ngu-so‘ldan,
O‘z bolangni o‘zing asra!

Bobolar tinch yotsin desang,
Tiniq tonglar otsin desang,
Yegan noning totsin desang,
O‘z bolangni o‘zing asra!

To‘kilmasin ko‘zdan jolang,
Oh bo‘lib chiqmasin nolang,
Axir u o‘zingning bolang,
O‘z bolangni o‘zing asra!

Qo‘llasin mard bobolaring,
Oftobyurak momolaring,
Tiniq bo‘lsin samolaring,
O‘z bolangni o‘zing asra!

Bu - dil amri, emas shior,
Atrofingga boqqil hushyor,
Chorlab turar ona diyor,
O‘z bolangni o‘zing asra!

Gullayotgan tuproq haqqi,
Uyingdagi chiroq haqqi,
Shu muqaddas bayroq haqqi,
O‘z bolangni o‘zing asra!

Yo‘lga chiqdi katta karvon,
Zamin qutlar, qutlar Osmon,
Yashnar desang O‘zbekiston,
O‘z bolangni o‘zing asra!

Yor MUHAMMAD.