Энди дори воситалари самарасизлиги аниқланса, амалиётга қўлланмайди
Соғлиқни сақлаш вазирининг “Фармакологик воситалар ҳамда дори воситаларининг клиник тадқиқотларини ўтказиш тартиби тўғрисидаги низомни тасдиқлаш ҳақида”ги буйруғи Адлия вазирлиги рўйхатидан ўтказилди.
Ҳужжатга мувофиқ, фармакологик воситалар ҳамда айрим тоифадаги дори воситалари фақат клиник тадқиқотларнинг ижобий натижалари асосида тиббиёт амалиётида қўллаш учун рухсат этилади.
Шу билан бирга, хавфсизлиги ва самарадорлиги илгари исботланган, Жаҳон соғлиқни сақлаш ташкилоти томонидан қайта малакаланган ёки биоэквивалентлиги тан олинган дори воситалари учун клиник тадқиқот ўтказиш талаби қўйилмайди.
Мазкур ёндашув илмий асосланган назоратни кучайтириш билан бир қаторда, ишлаб чиқарувчилар ва импорт қилувчилар учун ортиқча бюрократик тўсиқларни камайтиришга хизмат қилади.
Клиник тадқиқотлар фақат Соғлиқни сақлаш вазирлиги томонидан белгиланган клиник базаларда, “Яхши клиник амалиёт” (GCP) стандартларига қатъий риоя қилинган ҳолда амалга оширилади.
Бу жараёнда ножўя таъсирлар ва асоратлар қатъий назорат остида бўлади. Агар дори воситаси бемор ҳаёти ва соғлиғига хавф туғдирса ёки клиник жиҳатдан самарасизлиги аниқланса, клиник тадқиқот белгиланган тартибда тўхтатилади.
Қисқа қилиб айтганда, мазкур низом дори воситаларини илмий асосда баҳолаш, беморлар ҳуқуқларини ишончли ҳимоялаш ҳамда давлат назоратининг шаффоф ва самарали механизмларини таъминлашга хизмат қилади.
Соғлиқни сақлаш вазирлиги ахборот хизмати.
