Самарқанддаги “тескари пирамида” шаклидаги “ғаройиб” бино бузилиши мумкин

Кеча, 27 май куни Қурилиш вазирлиги мазкур бинонинг бузилиши ҳақда маълум қилди.

Ушбу бино Самарқанд тумани «Жойи сой» маҳалласида жойлашган бўлиб, фуқаро ўз уйининг бир қисмини бузиб, ўрнидан 21,4х12,6 метр ўлчамдаги 11 қаватли, 2 қават ертўлали меҳмонхона қурган.

Вазирлик хабарига кўра, бино қурилишга рухсат берувчи шаҳарсозлик ҳужжатлари расмийлаштирилмасдан амалга оширилган. Шунингдек, бино белгиланган тартибда шаҳарсозлик кенгашидан ўтмаган. Қурилишга рухсат берувчи Самарқанд тумани ҳокимининг қарори ёки туман қурилиш бўлимининг рухсатномаси, архитектура режалаштириш топшириғи мавжуд эмас. Қурилиш давомида ҳудудий инспекция ходимлари томонидан бир неча бор қурилишни тўхтатиш бўйича кўрсатмалар берилган бўлса-да, уни ўзбошимчалик билан давом эттирилган.

«Ўзоғирсаноатлойиҳа» АЖ ва ҳудудий инспекция ходимлари томонидан 2022 йил 6 май куни бинонинг сейсмик ҳолати ўрганиб чиқилиб, «Ўзоғирсаноатлойиҳа» АЖнинг хулосасига асосан бинонинг КМК, ШНК талабларига жавоб бермаслиги ва колонналарнинг айрим жойлари дарз кетгани ўз тасдиғини топган ҳамда бинони бузиш бўйича хулоса берилган.