Хитой компанияси янги "Тошкент – Самарқанд" темир йўл линиясини қуриши мумкин
Транспорт вазирлиги тарқатган хабарда шу ҳақда сўз юритилган.
Қайд этилишича, Транспорт вазири ўринбосари Жасурбек Чориев Хитойнинг «Tianjin Rail Transit Group» компанияси бош директори ўринбосари Юнкан Ма билан музокаралар ўтказган.
Унда метрополитен ва темир йўл транспортини ривожлантириш соҳасидаги ҳамкорлик масалалари муҳокама этилган.
Хусусан, Хитой томони мавжуд метро линияларини реконструкция қилиш ва янгиларини қуриш, шунингдек, "Тошкент – Самарқанд" янги темир йўл линиясини барпо этиш лойиҳасида иштирок этишга қизиқиш билдирган. Компания мазкур лойиҳаларни батафсил ўрганиш асосида ўз таклифларини тақдим этишга тайёрлигини маълум қилган.
Учрашув давомида Жасурбек Чориев "Хитой – Қирғизистон – Ўзбекистон" темир йўли ва Трансафғон коридорини қуриш бўйича йирик лойиҳалар ҳақида ахборот берган. Мазкур лойиҳаларни амалга оширишни молиялаштириш, илғор технологиялар ва инновацион ечимларни жалб этиш борасида ҳамкорликка қизиқиш юқори эканлигини билдирган.
