Viloyat bo‘yicha yarim yilda virtual va Xalq qabulxonalariga 61 mingdan ortiq murojaatlar kelib tushgan
Prezident virtual qabulxonasi va Xalq qabulxonalari bugun bevosita davlat rahbariga murojaat qilish, xalq bilan doimiy muloqot olib borish, odamlarni qiynab kelayotgan muammolarni o‘z vaqtida samarali hal etishning ta’sirchan mexanizmiga aylandi.
O‘zbekiston Respublikasi Prezidentining tuman va shaharlardagi Xalq qabulxonalari aholi bilan to‘g‘ridan-to‘g‘ri muloqotni tashkil etish, ularning huquqlari, erkinliklari hamda qonuniy manfaatlarini to‘laqonli himoya qilishga qaratilgan bo‘lib, fuqarolar murojaatlari bilan ishlashning eng samarali va tizimli faoliyatini ta’minlashda muhim o‘rin tutmoqda.
Birgina Samarqand viloyatidagi Xalq qabulxonalarining virtual tizim hisobotlari orqali joriy yilning birinchi yarmidagi faoliyatini sarhisob qiladigan bo‘lsak, o‘tgan davrda virtual va Xalq qabulxonalariga 61 mingdan ortiq yuridik va jismoniy shaxslardan turli masalalarda murojaatlar kelib tushgan.
E’tiborlisi, bu murojaatlarning 40 mingga yaqini (73 foizi) qanoatlantirilgan. 866 tasi rad etilgan, 185 tasi ko‘rmasdan qoldirilgan, 13 mingga yaqini bo‘yicha asosli tushuntirish berilgan.
Viloyat aholisi tomonidan asosan, pensiya ta’minoti va ijtimoiy himoya (5,4 ming), sud qarorlarini ijro etish, aliment va qarz undirish (5,4 ming), elektr energiyasi (4,6 ming), gaz ta’minoti (4,1 ta), huquqbuzarliklar haqida xabar berish (4,5 ming), moddiy yordam va homiylik (3,6 ming), uy-joy (1,8 ming), bandlik (1,6 ming), yo‘l infratuzilmasi (1,5 ming), davolash va tibbiy xizmat ko‘rsatish (1,4 ming), yer munosabatlari (1,2 ming), huquqni muhofaza qilish xodimlari faoliyati (1,2 ming), mehnatga haq to‘lash (1,1 ming), mahallabay ishlash va tadbirkorlikni rivojlantirish (1026) va ichimlik suvi ta’minoti (1079) masalalari ko‘tarilgan.
Xalq bilan muloqot tizimini yanada takomillashtirish, aholi uchun dolzarb bo‘lgan muammolarni tezkor hal etish maqsadida vazirlik va idoralar, sektorlar, shahar va tumanlardagi barcha darajadagi tashkilotlar rahbarlari tomonidan joylarda o‘tkazilayotgan ommaviy sayyor qabullar ham yaxshi samara bermoqda.
Joriy yilning 6 oyi davomida viloyatda 1798 marotaba ana shunday ommaviy qabullar o‘tkazildi. Qabullar davomida 18 458 nafar fuqarodan 19 070 ta murojaat kelib tushdi va 8 705 tasi (45 foizi) ijobiy hal etilgan.
Jumladan, Samarqanl viloyati hokimi, birinchi sektor rahbarining Jomboy tumani Olmazor mahallasidagi sayyor qabulida fuqarolar tomonidan bildirilgan murojaatlar asosida mahallaning 7 qishlog‘iga 305 dona tayanch beton ustunlar, 12,0 km. SIP kabellari, 6 dona qo‘shimcha transformator o‘rnatilmoqda. 5 kilometr ichki tuproq yo‘llari shag‘allashtirildi. Yana 15,5 kilometr ichki yo‘llarni ta’mirlash ishlari boshlandi. Mahalladagi 41-umumiy o‘rta ta’lim maktabi rekonstruksiyasiga kirishildi.
Past Darg‘om tumani hokimi, birinchi sektor rahbarining Amir Temur nomli mahallasidagi sayyor qabulidani so‘ng hududdagi transformator punkti ta’mirlandi. Qo‘shrabot tumani soliq inspeksiyasi boshlig‘i, to‘rtinchi sektor rahbarining Ozod mahallasida o‘tkazgan sayyor qabulida fuqaro Bahrom Rahmonov qishlog‘i hududidagi ta’mirtalab elektr tarmoqlarini yangisiga almashtirib berishda amaliy yordam so‘ragan edi. Bu masala ham qisqa vaqtda ijobiy hal etildi.
Toyloq tumani Shopo‘lot maxallasida o‘tkazilgan sayyor qabulda esa mahallaning bir guruh fuqarolari hudud aholisini toza ichimlik suvi bilan ta’minlashda amaliy yordam berish to‘g‘risida murojaat qilgan edi. Mazkur murojaat Xalq qabulxonasi nazorati ostida joyida ko‘rib chiqildi va 1,5 kilometr suv tarmog‘ini tortish ishlari amalga oshirilib, 50 ta xonadon ichimlik suvi bilan ta’minlandi.
Sayyor qabullarda kelib tushgan murojaatlarning belgilangan tartibda ko‘rib chiqilishi alohida nazoratga olinib, virtual tizim orqali tegishli mas’ul idora va tashkilotlarga yuborilmoqda.
Aholining davlatdan va islohotlardan roziligiga erishish borasida bevosita Xalq qabulxonalari tomonidan ham zarur chora-tadbirlar ko‘rilmoqda. Xususan, viloyat Xalq qabulxonasi tashabbusi bilan Payariq tumani Sarbozor mahallasi O‘rtasaydov qishlog‘ida yashovchi A.Ochilovning uy-joyi o‘ta ta’mirtalab holatga kelib qolganligi aniqlanib, homiylar jalb qilingan holda xonadon to‘liq qayta ta’mirdan chiqarildi. Tumanning Ko‘lto‘sin mahallasida yashovchi, boquvchisini yo‘qotgan G.Otamurodovaning uy-joyi ham shu tartibda ta’mirlandi.
Bulung‘ur tumani Yangiariq mahallasi aholisini juda ko‘p yillardan buyon qiynab kelayotgan muammolar ham Xalq qabulxonasi tashabbusi bilan bartaraf qilindi. Ya’ni, 1,5 kilometr ariq-zovurlar tozalandi, 2 kilometrdan ortiq ichki yo‘llar shag‘allashtirilib, hozirda 1,3 kilometr yo‘lga asfalt yotqazish ishlari olib borilmoqda.
Qo‘shrabot tumani Namuna mahallasi yashovchi Elmurod Xo‘janovning qishloq hududidagi yo‘llarni ta’mirlab, asfalt qilib berish bo‘yicha tuman Xalq qabulxonasiga qilgan murojaati joyiga chiqib o‘rganilgach, tuman yo‘llardan foydalanish unitar korxonasi tomonidan qishloqdagi 1,2 kilometr yo‘lga asfalt qoplamasi yotqizildi, 2 kilometr yo‘l qum-shag‘al yotqizilib, ta’mirlandi.
Ishtixon tumani Zarband mahallasida yashovchi fuqaro M.Nursodiqovning turmush o‘rtog‘ida murakkab jarrohlik amaliyotini o‘tkazishda amaliy yordam so‘rab tuman Xalq qabulxonasiga murojaati ham ijobiy hal etildi. Bemor viloyat ko‘p tarmoqli tibbiyot markazida imtiyozli yo‘llanma asosida davolanib, jarrohlik amaliyoti o‘tkazildi va salomatligi tiklandi.
Bu kabi misollarni ko‘p keltirish mumkin. Muhimi, aholining Prezident virtual va Xalq qabulxonalariga har murojaati ijobiy hal etilishiga erishilmoqda.
Shu bilan birga, aholi murojaatlari hamda aniqlangan muammolarga e’tiborsizlik qilgan, bu borada qonun buzilishiga yo‘l qo‘ygan 350 dan ortiq mansabdor shaxslar bo‘yicha Xalq qabulxonalari tomonidan mahalliy kengashlarga axborot hamda davlat organlari va tashkilotlariga taqdimnoma va takliflar kiritilgan. Ushbu hujjatlar asosida 303 nafar mas’ul xodimlarga nisbatan tegishli choralar ko‘rilgan.
Mamatjon TURDIYeV,
O‘zbekiston Respublikasi Prezidentining
viloyatdagi Xalq qabulxonasi mudiri.
