Bahodir Jalolov WBC talqini bo‘yicha yilning eng yaxshisi bo‘lishi mumkin. U nomzodlar safida

Superog‘ir vazn toifasidagi bokschimiz Bahodir Jalolov Butunjahon boks kengashi (WBC) tomonidan istiqbolli bokschi nominatsiyasida nomzodlar qatoriga kiritildi.

Mazkur nominatsiya yil davomida o‘z iste’dodini ko‘rsatib, katta o‘sishga erishgan bokschilarga taqdim etiladi. Bahodir Jalolovdan tashqari ushbu sovrin uchun irlandiyalik Kallum Valsh, meksikalik Xose Salas, amerikalik Richard Torres va Floyd Shofiyeld, Gvatemala vakili Lester Martinez da’vogarlik qilmoqda.
G‘olib sportchi nomi ovoz berish yo‘li bilan aniqlanadi. Hozirda WBC’ning Instagram sahifasida ovoz berish jarayoni ketmoqda.
“Har yili minglab iste’dodlar o‘z qobiliyatlarini namoyish etishadi va ulardan bittasini tanlash juda ham mushkul ish. Bu bizning yakuniy olti bokschimiz. Siz ulardan birini tanlashingiz mumkin", deyiladi tashkilot xabarida.