Barcha maktablar ochilsa, onlayn o‘qish to‘xtatiladimi?

Laylo Rustamova, Xalq ta’limi vazirligi axborot xizmati rahbari:

➖ Butun dunyodagi singari yurtimizda ham pandemiya hali barqarorlashgani yo‘q. Shu sababli gibrid shakldagi ta’lim hali davom etadi.

Ya’ni, farzandi salomatligidan havotir oladigan, uydagi karantin holati yaxshi bo‘lmagan ota-onalar farzandlarini masofaviy shaklda ta’lim olishini davom ettirishlari mumkin. Bugungi kunda respublikamizdagi 10 008 ta maktabdan 9 990 tasi, ya’ni 99,8 foizi to‘laqonli ravishda ishlamoqda. O‘quvchilardan 4,5 million nafari, ya’ni 72 foizi an’anaviy, qolgan 1,7 million nafari, ya’ni 28 foizi onlayn shaklda tahsil olmoqda.

O‘quvchilarning masofaviy shaklda ta’lim olishi bekor qilingan taqdirda ham bugun Onlayn-maktab loyihasi uzatilayotgan telekanallardan qo‘shimcha ta’lim olish uchun foydalanish ko‘zda tutilgan. Bu esa hududlardagi ko‘pchilik maktablardagi o‘quvchilarga sifatliroq qo‘shimcha ta’lim olish uchun imkoniyat beradi.