Bugun tug‘ilgan kun: Saydulla Mirzayev
Adabiyot jonkuyari, ziyolilar fidoyisi Saydulla Mirzayev 1930 yil 8 avgustda Paxtachidagi Qarnab qishlog‘ida tug‘ilgan.
1946 yili SamDU o‘zbek filologiyasi fakultetiga o‘qishga kirib, umrining oxiri – 2012 yilgacha shu dorilfununda ishladi. Aspirant, doktorant, professor, kafedra mudiri, fakultet dekani sifatida faoliyat ko‘rsatdi.
15 yil davomida O‘zbekiston Yozuvchilar uyushmasi Samarqand viloyat bo‘limiga jamoatchilik asosida raislik qildi.
Saydulla Mirzayev sermahsul olim edi. U “Adabiy do‘stligimiz sahifalari”, “O‘zbek adabiyoti tarixi”, “G‘oya va obraz”, “Oydinning mahorati”, “O‘zbek romanchiligi”, “Iste’dodning kamoloti”, “Mustaqillik davridagi o‘zbek adabiyoti”, “Hayot va adabiyot”, “Mustaqillik va adabiyot haqida yangicha qarashlar”, “XX asr o‘zbek adabiyoti” singari 25 ta monografiya, darslik, o‘quv qo‘llanma va risolalar hamda olti yuzdan ziyod ilmiy va publitsistik maqolalar muallifidir.
Saydulla Mirzayev 2012 yilda 82 yoshida vafot etdi.
