Elektr energiyasi ortiqcha hisoblanyaptimi? Raqobat qo‘mitasi tomonidan bu bo‘yicha tezkor ishchi guruh tuzildi
Ijtimoiy tarmoqlarda hisoblagichlarning elektr quvvatini ortiqcha hisoblayotganligi va bu qo‘shimcha xarajatlarga sabab bo‘layotganligi yuzasidan iste’molchilar tomonidan murojaatlar tarqalib, bu keng jamoatchilikning e’tirozlariga sabab bo‘ldi.
Bugun Raqobatni rivojlantirish va iste’molchilar huquqlarini himoya qilish qo‘mitasi tomonidan mazkur holatga munosabat bildirilib holat o‘rganilayotganini ma’lum qildi.
“Mazkur holatlarni joylarga chiqqan holatda o‘rganib, muammolarni manzilli hal etish choralarini ko‘rish maqsadida Raqobatni rivojlantirish va iste’molchilar huquqlarini himoya qilish qo‘mitasi tomonidan tezkor ishchi guruh tashkil etildi.
Ishchi guruh tarkibiga Raqobat qo‘mitasi bilan birgalikda, "O‘zenergoinspeksiya", O‘zbekiston texnik jihatdan tartibga solish agentligi hamda “Toshkent shahar elektr tarmoqlari” MChJ vakillari jalb qilingan.
Ushbu holatlarni o‘rganish davomida aniqlanadigan kamchiliklarni bartaraf etish bo‘yicha qonuniy choralar ko‘rilishi ta’minlanadi.
Hurmatli iste’molchilar, sizda ham yuqoridagi kabi muammoli holatlar mavjud bo‘lib o‘z yechimini topmayotganligidan norozi bo‘lsangiz, Raqobat qo‘mitasining yagona ishonch (1159) raqamiga yoki Telegram messenjerida @rquzBot orqali murojaat qilishingiz mumkinligini ma’lum qilamiz!” deyiladi Qo‘mitaning rasmiy sahifasida.
