E’lon qilinmagan tashrif: Jo Baydenning AQSh prezidenti sifatida Kiyevga birinchi tashrifi haqida nimalar ma’lum?
Dushanba kuni AQSh prezidenti Jo Bayden davlat rahbari sifatida ilk bor Kiyevga tashrif buyurdi. U ukrainalik hamkasbi Vladimir Zelenskiy bilan uchrashib, Ukrainaga yana 500 million dollarlik harbiy yordam paketi ajratilishini e’lon qildi va hafta oxirigacha Rossiyaga qarshi yangi sanksiyalarni joriy etilishini ma’lum qildi.
20 fevral kuni Ukrainada 2014 yilda Kiyevdagi davlat to‘ntarishida halok bo‘lgan ishtirokchilar xotirasiga belgilangan "Samoviy yuz qahramonlar kuni" deb nomlangan bayram nishonlandi. Bayden va Zelenskiy tegishli yodgorlik joylashgan Mixaylovskaya maydoniga tashrif buyurishdi.
Kutilmagan tashrif
Baydenning Kiyevga safari e’lon qilinmagan. Avvalroq u 20-22 fevral kunlari Polshaga tashrif buyurishi xabar qilingan bo‘lib, Oq uy prezidentning Ukrainaga tashrif buyurishi rejalarini rad etgan edi.
Dushanba kuni ertalab Kiyev markazida tirbandlikka olib kelgan yo‘llar to‘sib qo‘yildi. Shuningdek, Ukraina-Polsha chegarasi uzra osmonda uch nafar Amerika razvedka samolyoti navbatchilik qilgani, kunning ikkinchi yarmida Ukraina tashqi ishlar vaziri o‘rinbosari va Berlindagi sobiq elchi Andrey Melnik Kiyevning “asosiy hamkorlari” tashrifi kutilayotganini ma’lum qildi.
Tushda Ukraina ommaviy axborot vositalari Baydenga o‘xshash odam bo‘lgan videolarni nashr eta boshladi. Ko‘p o‘tmay, Zelenskiy o‘zining Telegram-kanalida amerikalik hamkasbi bilan qo‘shma surat joylashtirdi, uning idorasi rahbari Andrey Yermak esa Baydenning milliy xavfsizlik bo‘yicha yordamchisi Jeyk Sallivan bilan Mariinskiy saroyida (Ukraina prezidentining qarorgohi) tushgan suratini joylashtirdi.
Politico gazetasining Kiyev vakiliga tayanib xabar berishicha, tashrif bir hafta ichida tayyorlangan. The New York Times gazetasining yozishicha esa Bayden Ukraina poytaxtiga Polshadan poyezdda kelgan.
Yordam va sanksiyalar
Zelenskiy bilan uchrashuvda Bayden Ukrainaga 500 million dollarlik yangi yordam paketi taqdim etilishini ma’lum qildi, deb xabar bermoqda Reuters. Bu 21 fevral, seshanba kuni rasman e’lon qilinadi.
Yordam paketiga o‘q-dorilar va tankga qarshi tizimlar, jumladan Javelin komplekslari, shuningdek, gaubitsa va radarlar kiradi. Zelenskiy, shuningdek, Amerika prezidenti bilan uzoq masofaga mo‘ljallangan qurollarni yetkazib berish masalasini ham muhokama qilganini ta’kidladi.
Xullas, Qo‘shma Shtatlar shu haftada Rossiyaga qarshi yangi sanksiyalar paketini e’lon qilmoqchi. Hafta oxirigacha joriy etilishi kutilayotgan navbatdagi cheklovlar paketi Yevropa Ittifoqi tomonidan ham muhokama qilinmoqda.
Bugunoq AQSh prezidenti Jo Bayden Kiyevni tark etgani haqida CNN muxbiri Keytlan Kollinz xabar berdi.
