Hafta davomida qanday ob-havo kuzatiladi?

Gidrometeorologiya xizmati markazi ushbu haftada kutilayotgan ob-havo haqida ma’lumot berdi.

Dam olish kunlarida yog‘ib o‘tgan yog‘ingarchilik - “birinchi qor”dan keyin, bugun O‘zbekiston hududida ob-havo yog‘inlarsiz va kambulutli o‘tmoqda. Bunday hol nam havo oqimlarining Ural tomondan respublikaga kirgan juda sovuq antitsiklon bilan o‘rin almashishi bilan bog‘liq. Kunduzgi harorat 0 darajadan oshmaydi.

Ertaga, 26 noyabr kuni antitsiklon ta’siri kuchayadi. Natijada tungi harorat 6-8 daraja sovuqqacha, ayrim joylarda esa 10-12 daraja sovuqqacha tushadi. Kunduzi quyosh nurlari havoni 3 darajagacha ilitadi.

Keyingi kunlarda antitsiklon Qozog‘istonning shimoli-sharqiy qismi tomon harakatlanib, ta’sirini kamaytiradi. Haftaning juma kuniga kelib tungi sovuq 0-5 daraja sovuqqacha ko‘tariladi, kunduzi havo harorati 5-7 daraja iliq bo‘lishi kutilmoqda.